گۆڕان، پێش ئەوەی کاردانەوە، یان هێزی سیاسیی، یان بەرژەوەندیی، یان خواست و ئارەزوو؛ بێت: ویست و پێویستییە، ئیرادەیە، بەردەوامیی و ڕاستڕێکردن و ماندونەبوون و سوربوون و جەسوربوون و مکوڕبوون و شێرگیریی و داکۆکیکردن و دادگەریی و ئامانجە، قبوڵکردنی یەکترو کاری پێکەوەیی و خۆنەویستیی و خۆبەخشیی و قوربانیدانە، تێپەڕاندنی خۆبەکەمزانیی و پەراوێزخستن و چەقبەستویی و کۆیلایەتیی و شکستخواردن و بێباکیی و نائومێدییە، بەشدارییەکە بۆ خزمەتی گشتیی و مۆدێلێکی ڕەوای هاووڵاتیی سەنتەریی و یاساسەروەریی حکومڕانییەکی ڕشت و ڕەشیدو، ژێر چاودێریی و لێپرسینەوەو، تیوارو دادگەر، بەشێوازو ڕێگاو میکانیزمی یاساییانەو مەدەنییانەو مرۆییانە؛ پشتبەستوو بە سەرمایەی مرۆیی نیشتمانەکەمان کار بۆ پاراستنی قەوارەی کوردستان و بەرژەوەندییە باڵاکانی خەڵک و ئاسایش و ئابوریی ستراتیژی نیشتمانیمان دەکات.
تەوژمێکە بۆ خزمەتی گشتیی، نەک بۆ دەسکەوتی تایبەتیی.
ئەم تەوژمە واقیعبینە لۆژیکییە، لە ڕەوانشاد نەوشیروان مستەفاوە دەستپێدەکات، هەر لە پێش دەستپێکردنی ڕاپەڕینەوە، لەگەڵ کێشانی نەخش و نەخشەی ڕاپەڕیندا، کار لەسەر ئەوە دەکات؛ کە چۆن ئەو شارو شوێنانەی ئازاددەکرێن؛ بپارێزرێن، لەگەڵ سەرکەوتنی ڕاپەڕیندا؛ هەوڵی مکوڕانەی فەرهادانە دەدات: دەوڵەتداریی بنیاتبنرێت، نەک دەسەڵاتداریی، زانیاریی و ئەزمونی شکست و سەرکەوتنەکان تۆماربکرێن، نەک تیرۆربکرێن، لە ئەنجامی یەکەم هەڵبژاردنی دوای ڕاپەڕیندا؛ هەوڵدەدات، هاواردەکات، تکا دەکات: پەیڕەوی حوکمداریی و ئۆپۆزسیۆنبوون پێکەوە قبوڵبکرێن، بۆ ئەوەی ئەزمونی هەردووکیان بەیەکەوە گەشەبکەن، داوا دەکات هەڵبژاردنەکان لە کات و وادەی خۆیاندابکرێن، بۆ ئەوەی ئەزمون و کولتوری هەڵبژاردن و مانادان بە دیموکراسیی ڕاستەقینە بنیاتبنرێت، دڵنیایە کە بەدیلی ئەم دوو هێزە دەسەڵاتدارە؛ تەنها بەدیلێکە کە ئەویش هێزی چەکدارو ئەمنییەت و مەعلوماتی لە چنگدابێت، بەڵام بەپێچەوانەوە بزوتنەوەیەکی مەدەنیی وەک بزوتنەوەی گۆڕان بنیاتدەنێت، بۆ ئەوەی هێزێک بێت هێز لە خۆی وەربگرێت و بۆ یەکجار بونێک بێت کە لە هەناوو منداڵانی خودی میللەتەکەوە، بەپشت بەستن بە هاونیشتمانیان و پرۆسەی دەنگدان؛ لەدایکببێت.
لە ئێستادا؛ بەهۆی خۆپارێزیی و سیاسەتی بۆڵبژێرانەو گزیلەیەککردن و خراپیی و ناڕاستیی پۆستەچیی و تەتەرو بێتمانەیی و دابڕان و دورکەوتنەوە لەیەک، بەهۆی ونکردنی ڕێگاو وێڵبوون و لەبیرخۆبردنەوەی هۆکارو ئەنجام و پاکێج و ستراتیژو ئامانجەکانەوە، دابەشبونێکی نالۆژیکیی هاتۆتەکایەوە، کە هەر بەشێک بەهانەو ئەرگومێنتی ڕەواو ناڕەوای بەشی خۆی پێیە، بەڵام ئەو ناوەندەی کە هەموو لا دادی خۆیان دەبەنەوە بەردەستیان و شەڕی خۆیانی پێدەکەن و شەڕی بۆ دەکەن و لە ڕووی دەستورییەوە لە دوای کۆنگرەوە، باڵاترین ئۆرگانی بڕیاردانە؛ نائامادەو نادیارو ناکارایە، ئەم گەمەی یەکترخواردنە، بێ دادوەر بەڕێوەدەچێت، وریانەبین پێدەچێت؛ بەهەموولا سەری گۆڕان بخۆن.
لە ئێستادا، لەسەر ئەم بنەمایانەی باسکران؛ کەس لە خۆمان بە گۆڕانتر نازانین، دۆخی گۆڕان هەرچۆن بێت، هەر چی بێت، وەک هەناسە، وەک ئاو، وەک ناو، وەک بوون، وەک مانەوە، وەک بەردەوامبوون و گەشەکردن؛ پێویستمان بە گۆڕانە.
هەموو شتتان کوشت، بە خودی ڕەوانشاد نەوشیروان مستەفایشەوە، کە نەمرد؛ کوشتتان، تکایە؛ گۆڕان مەکوژن، با تروسکایی ئومێد نەکوژێتەوە، با ڕەنجبەخەسارانە، بەسەری بڕاوەوە، بە بەرگی دڕاوەوە؛ نەگەڕێنەوە..
پێکەوە بێ وەسیت و ڕەقیب؛ دابنیشن، متمانە دروستبکەنەوە، متمانە وەک خۆشەویستیی قوربانیدان و بەخشین و دانبەهەڵەو لێبوردنی دەوێت، بۆ جارێک سەرکردەبن، سەری کۆکەرەوەبن، نەک سەرکەش و سەرەڕۆ..
د. هەڤاڵ ئەبوبەکر