کۆشکی سپی ڕایگەیاند، دۆناڵد ترەمپ، سەرۆکی ئەمریکا و ڤلادیمێر پوتین، هاوتا ڕووسییەکەی، ڕێککەوتن لەسەر ئاگربەستی 30 ڕۆژە لە ئۆکرانیا، لەنێویاندا کەرتی وزە و ژێرخانی ئابووری، هاوکات جەختیان لەسەر دەستپێکردنی گفتوگۆی خێرا بۆ گەیشتن بە ئاگربەستێکی فراوانتر کردووەتەوە.
كۆشكی سپی ئەوەشی روونكردوەتەوە، ئەم گفتوگۆیانە لە ڕۆژهەڵاتی ناوەڕاستەوە دەستپێدەکەن، ئاماژەی بەوەشکرد، باشترکردنی پەیوەندییەکانی نێوان واشنتۆن و مۆسکۆ دەتوانێت سوودی ئابووری و جیۆپۆلەتیکی بەرچاوی هەبێت.
لەلای خۆشیەوە كۆشكی کرێملین رایگەیاند: پوتین ڕازی بووە بە پێشنیازی سەرۆک ترامپ کە ڕووسیا و ئۆکرانیا بۆ ماوەی ٣٠ ڕۆژ دەست لە بەئامانجگرتنی ژێرخانی وزەی یەکتر هەڵبگرن و فەرمانی بە سوپای ڕووسیا دا کە باپەند بن بەو ڕێكەوتنەوە.
کرێملین ئاماژەشی بەوەدا کە هەردوو سەرۆك لە میانی پەیوەندییەکی تەلەفۆنیدا بیروڕای ورد و ڕاشکاوانەیان لەبارەی ئۆکرانیا ئاڵوگۆڕ کردووە، پوتین جەختی لەوە کردەوەتەوە کە چارەسەری ململانێکان دەبێت هەمەلایەنە و بەردەوام و درێژخایەن بێت، بە لەبەرچاوگرتنی بەرژەوەندییە ئەمنییەکانی ڕووسیا و ڕەگ و ڕیشەی شەڕەکە.
کرێملین ئاماژەی بەوەشكردوە کە پوتین خاڵە گرنگەکانی پەیوەست بە چاودێریکردنی جێبەجێکردنی ئاگربەستەکە و دڵنیابوون لەوەی ئۆکرانیا ئیستغلال نەکات بۆ کۆکردنەوەی هێزی زیاتر و چەکدارکردنی هێزەکانی تاوتویكردووە.
هەروەها جەخت لەوە کرایەوە کە مەرجی سەرەکی ڕێگریکردن لە پەرەسەندنی ململانێکان و کارکردن بۆ چارەسەرکردنی لە ڕێگەی سیاسی و دیپلۆماسییەوە دەبێت "وەستاندنی تەواوەتی" هاوکارییە سەربازییە دەرەکییەکان و دابینکردنی هەواڵگری بۆ کیێڤ بێت.
هەروەها پوتین ئامادەیی خۆی دەربڕی بۆ کارکردن لەگەڵ ئەمریکا لەسەر "رێگا ئەگەرییەکانی چارەسەرکردن"ی کێشەکانی ئۆکرانیا

لەگەڵ باشتربوونی پەیوەندییەکانی نێوان واشنتۆن و مۆسکۆ، پەیوەندییەکانی ئەمریکا لەگەڵ ئۆکرانیا ئاڵۆزتر بووە.
ئاڵوگۆڕێکی گشتی و تەلەفزیۆنی لە نێوان ترەمپ و ڤۆلۆدیمیر زێلێنسکی سەرۆکی ئۆکرانیا لە ٢٨ی شوباتدا لە کۆشکی سپی سەریهەڵدا و ئەمەش وایکرد ئەمریکا هاوکارییە سەربازییەکانی کیێڤ بەشێوەیەکی کاتی ڕابگرێت.

دواتر زێلێنسکی ڕازی بوو بە پلانی ئاگربەست و ڕێککەوتنێک کە ئەمریکا بە ئیمتیازاتی دەستڕاگەیشتن بە کانزاکانی زەوی دەگمەن لە ئۆکرانیا ڕازی بوو.
هەوڵەکان بۆ گەیشتن بە ئاگربەست لە ئۆکرانیا لە کاتێکدایە کە ڕووسیا لە چەند بوارێکدا بە درێژایی هێڵی پێشەوە پێشڕەوی دەکات.
لە چەند ڕۆژی ڕابردوودا مۆسکۆ ستایشی پاشەکشەی هێزەکانی ئۆکرانیای لە ناوچەی کورسک لە ڕۆژئاوای ڕووسیا کرد، سەرەڕای ئەوەی کیێڤ کۆنترۆڵی ئەم ناوچەیەی بە موزایەدەی گرنگ زانیبوو.
نیگەرانییەکان لەنێو هاوپەیمانەکانی ڕۆژئاوادا پەرەی سەندووە کە ترەمپ بەبێ ئەوەی داوای ئیمتیازات بکات، زۆر پێشکەش بە پوتین دەکات.
ترەمپ چەندین جار جەختی لەسەر خواستی خۆی کردووەتەوە بۆ وەستاندنی خوێنڕشتن بە هەر نرخێک بێت و هەوڵدەدات بەڵێنەکەی لە ساڵی ٢٠٢٤ی هەڵمەتی هەڵبژاردنەکاندا جێبەجێ بکات کە شەڕەکە بە خێرایی کۆتایی پێبهێنێت.

ژمارەی خوێندراو : 71 جار