ئێران دەقی نامەكەی ترامپی ئاشكرا كرد

5 رۆژ پێش ئێستا

سەرچاوە ئێرانییەکان دەقی نامەکەی دۆناڵد ترامپ، سەرۆکی ئەمریکایان بۆ ئەنجومەنی ئاسایشی نەتەوەیی ئێران ئاشکراکرد

محەمەد ساڵح سێدقیان، بەڕێوەبەری ناوەندی عەرەبی بۆ لێکۆڵینەوەکانی ئێران لە ڕێگەی هه‌ژماری تایبه‌تی خۆیەوە لە پلاتفۆڕمی ئێکس، پەیامێکی دۆناڵد ترامپ، سەرۆکی ئەمریکای بڵاوکردەوە و ڕایگەیاند، ده‌قی نامه‌كه‌ "دەستکاری نەکراوە و وەرگێڕدراوە بۆ زمانی عەرەبی، نامەوێت کۆمێنت بکەم، چونکە بۆ خۆی قسە دەکات" ترا‌مپ نوسیویه‌تی:

ـ لە ژێر سەرکردایەتی مندا ئەمریکا ئامادەیە هەنگاوێکی گەورە بەرەو ئاشتی و کەمکردنەوەی گرژییەکان بنێت، پێکەوە دەتوانین گەمارۆکان لاببەین و ئابوری ئێران بەهێز بکەین و دەرگای هاوکاریی نێوان دو وڵاتەکەمان بکەینەوە".
ـ جەنابی ئایەتوڵا خامنەیی، لەگەڵ ڕێزگرتن لە ڕێبەرایەتی ئێوە و خەڵکی ئێران، بە ئامانجی کردنەوەی ئاسۆی نوێ بۆ پەیوەندییەکانمان، دور لە ساڵانی ململانێ و لێکتێگەیشتن و ڕوبەڕوبونەوەی ناپێویست کە لە دەیەکانی ڕابردودا شاهیدی بوین، ئەم نامەیەتان بۆ دەنوسم، کاتی ئەوە هاتوە دوژمنایەتی بەجێبهێڵین و لاپەڕەیەکی نوێی هاوکاری و ڕێزگرتنی یەکتر بکەینەوە، ئەمڕۆش دەرفەتێکی مێژویی لەبەردەمماندایە".
- لە ژێر سەرکردایەتی مندا ویلایەتە یەکگرتوەکانی ئەمریکا ئامادەیە هەنگاوێکی گەورە بەرەو ئاشتی و کەمکردنەوەی گرژییەکان بنێت، پێکەوە دەتوانین گەمارۆکان لاببەین و ئابوری ئێران بەهێز بکەین و دەرگای هاوکاریی نێوان دو وڵاتەکەمان بکەینەوە، نەک تەنها بۆ بەرژەوەندی دو گەلەکەمان، بەڵکو بۆ قازانجی سەقامگیری و ئاشتی لە ڕۆژهەڵاتی ناوەڕاست و هەمو جیهان".
- ئاگادارتان دەکەمەوە، ئەگەر ئەم دەستە درێژکراوە ڕەتبکەنەوە و ئەگەر ڕێژیمی ئێران ڕێگای پەرەسەندن و بەردەوامی پشتیوانی لە ڕێکخراوە تیرۆریستیەکان و سەرگەرمییە سەربازییەکان هەڵبژێرێت، ئەوا وەڵامدانەوەی یەکلاکەرەوە و خێرا دەبێت، ئێمە لە بەرامبەر هەڕەشەکانی ڕژێمەکەت بۆ سەر گەلەکەمان یان هاوپەیمانەکانمان بێده‌نگ نابین".
ـ "ئاشتی لاوازی نییە، بەڵکو هەڵبژاردنی بەهێزەکانە، گەلی ئێران گەلێکی مەزنن کە شایەنی ئایندەیەکی باشترن، دور لە گۆشەگیری و هەژاری و مەینەتی، ئەگەر ئێوە ئامادەن بۆ دانوستان، ئێمەش ئامادەین، بەڵام ئەگەر بەردەوام بن لە پشتگوێخستنی داواکارییەکانی جیهان، مێژو تۆماری دەکات کە دەرفەتێکی گەورەت لەدەستداوە".

ژمارەی خوێندراو : 390 جار

هەواڵی زیاتر