دەقی بەیاننامەی پزیشکانی کوردستان لەسەر گیان لە دەستدانی هاوپیشە و پزیشکی جوانەمەرگ د.قەحتان
بەڕێزان
سەرۆکایەتیی هەرێم
سەرۆکایەتی حکومەتی هەرێم
پەرلەمانی کوردستان
وەزارەتی تەندروستی
ڕێکخراوەکانی کۆمەڵگەی مەدەنی
کۆمەڵانی خەڵکی کوردستان و ڕای گشتیی
بە داخەوە وەک لای هەمووتان ئاشکرایە کە بەرەبەیانی ڕۆژی ٢٠٢٥/٣/٢١ لە کارەساتێکی نەخوازراو و جەرگبڕدا، هاوپیشەی جوانەمەرگمان پزیشکی نیشتەجێ د.قەحتان جیهاد، لە کاتی گواستنەوەی نەخۆش بە ئەمبوڵانس لە نەخۆشخانەی مێرگەسۆر بۆ نەخۆشخانەی بلێ لە سنووری پارێزگای هەولێر، دوای ڕووداوێکی دڵتەزێن لە ئەنجامی ڕووداوی هاتوچۆ گیانی سپارد و کۆمەڵی پزیشکان بەتایبەتیی و هەموو کوردستان بە گشتیی، پزیشکێکی گەنجی لێهاتوو و دڵسۆز و خۆنەویست و خۆشەویستی هاوپیشە و خەڵکی، لە دەستدا کە نموونەی بەرزی قوربانیدانی پزیشکێک بوو بۆ ئەرکی پاراستنی ژیانی مرۆڤێک بەرامبەر ژیانی خۆی.
بەڵام جێگەی نیگەرانیی و داخی زۆری ئێمەی پزیشکانە کە نە لایەنی پەیوەندیدار بەپێی پێویست، نە ڕاگەیاندنەکان و میدیاکاران بە ئەرکی خۆیان نەزانی کە بەدواداچوونێکی پوخت لەسەر هۆکاری گیان لە دەستدانی سامانێکی گرنگی نیشتیمانیی کە پزیشکێکی گەنجە، بکەن و بگرە بەشێکیان بێ دەنگیش بوون بەرامبەر ئەو کارەساتە کە پەیوەندیی بە ژیانی هەموو تاکێکمان هەیە.
گیان لە دەستدانی جوانەمەرگ قەدەرێکی خواییە و قسە لەسەر ئەوە نییە، بەڵام بە هۆکاری کەمتەرخەمی بێت، ئا ئەوەیان کارەساتە، چونکە بە دڵنیاییەوە ئەو کەمتەرخەمییە دەمێکە هەیە و چەندین جار باس کراوە، بە جۆرێک دڵنیاتان دەکەینەوە کە زۆربەی هەرەزۆری ئەو ئوتومبێلانەی کە بۆ ئەمبوڵانس تەرخان کراون، مەرجی تەواویی ستاندەردە جیهانییەکانی نییە! ئەمە ڕاستییەکەیە کە بەداخەوە ئەمبوڵانس لەم ووڵاتە بەتایبەت لە ناوچەکانی دەرەوەی سەنتەری پارێزگاکان هەندێک لە مەرجەکانی (پزیشکیی، فریاکەتنی خێرا، سەلامەتیی سەرنشینان)ی تێدا بەدی ناکرێت و تەنها بووە بە هۆکارێک بۆ گواستنەوەی نەخۆش.
بەڕێزان..
پزیشکێکی گەنجی تازە دامەزراو کە کۆڵەگەی سەرەکیی سیستەمی نەخۆشخانە و پڕاکتیزەی پیشەی پزیشکییە، بەداخەوە لای ئێمە بێ نازترین و ماندووترین و مەغدورترین چینی کۆمەڵگەن لە هەموو لایەنێکەوە، ئاشکرایە کە گوزەرانی پزیشکی گەنج سەرباری ئەو هەموو ئەرک و ماندووبوونەی، مافی تەواوی نادرێت! لەپاڵ ئەوەشدا لە هەم و ئان و ساتێکدا ژیانی لەژێر پاڵەپەستۆی نەبوونی سیستەمێکی تۆکمە و هێرشی ناهەقی خەڵکی نابەرپرس، لە مەترسیی دایە.
بەڕێزان..
لە سۆنگەی ئەو کارەساتە جەرگبڕە، ئێمەی کەس و کاری خۆتان لە پزیشکان داواکارین لە بەڕێزان بە تایبەت بەڕێز سەرۆکی ئەنجومەنی وەزیران و بەڕێز وەزیری تەندروستی کە:
یەکەم/
بە زووتریین کات لێژنەیەکی هاوبەش پێک بهێنرێت بۆ لێکۆڵینەوە و بەدواداچوون و ڕوون کردنەوەی هۆکاری گیان لە دەستدانی د.قەحتانی جوانەمەرگ و بڵاوکردنەوەی ڕاپۆرتی کۆتایی بۆ ڕای گشتی و سزادانی هەموو ئەوانەی کەمتەرخەم بوون لەو کارەساتە. لەگەڵ ئەمەشدا قەرەبووی ماددیی و مەعنەویی خێزانی خوالێخۆشبوو بکرێتەوە.
دووەم/
داواکارین وەک وەفایەک و هاوسۆزیی و ئەرکێک، یەکەی فریاکەوتنی نەخۆشخانەی مێرگەسۆر بە ناوی هاوپیشەی کۆچکردوو بکرێت و وەک کەمتریین پاداشت بۆ خێزانەکەی، بە شەهید ناونووس بکرێت و مووچەی قەرەبووی مانگانەی شەهیدانەی خوا لێخۆشبوو بۆ خێزانەکەی خەرج بکرێت.
سێیەم/
تا زووە و کارەساتی زیاتر ڕووی نەداوە و بۆ پاراستنی گیانی پزیشکان و کارمەندان و تەنانەت نەخۆش، چاوخشاندنەوە بکرێت بە سیستەمی فریاکەوتنی خێرا هەر لە ئوتومبێل و شۆفێر و کارمەندی ئەمبولانس، بەجۆرێک هیچ شۆفێرێک یان کارمەندی فریاکەوتنی خێرا بێ بڕوانامەی باوەڕپێکراو و بڕوانامەی خولاوی وەرزیانەی فریاکەوتنی خێرا نابێت لە سیستەمی ئەمبولانس بوونی هەبێت، لە پاڵ ئەوەدا گۆڕینی تەواوی ئەمبوڵانس و دابین کردنی بە شێوازێکی ستانداردی جیهانیی بۆ هەموو نەخۆشخانەکانی هەرێم بێ جیاوازیی.
چوارەم/
ناکرێت بەو شێوەی ئێستا بەردەوام بێت ئیتر پێویستە بە زووتریین کات بابەتی دامەزراندنی پزیشکانی گەنج جێبەجێ بکرێت و سیستەمی خولاوی پزیشکان با تووشی هەرەس نەبێت لەوە زیاتر، تکا دەکەین بە زووترین کات بە فەرمانێکی تایبەت کار لەسەر دامەزراندنی خێرای پزیشکانی گەنج بکرێت، لەپاڵ ئەوەدا مووچەی مانگانەی پزیشکانی گەنج (کە تاکە سەرچاوەی گوزەرانیانە) جیا بکرێتەوە و لە ئان و ساتی خۆی خەرج بکرێت.
پێنجەم/
ڕێگریی بکرێت لەهەر کەناڵ و میدیایەک بەتایبەت سۆشیال مێدیا سەر بەهەر لایەنێک بێت کە بە مەبەست کار لەسەر ناوزڕاندن و کەمکردنەوە لە پێگەی پزیشک و نەهێشتنی متمانەی هاونیشتمانیان بە پزیشکان و کۆی خزمەتی تەندروستی دەکەن. سزای تووندیی یاسایی ئەو ڕاگەیەندکارانە بدرێت کە تەنها بۆ لایک و کۆمێنتی پەڕە و گروپەکانیان بە شێوازێکی زۆر ناڕەواو و دوور لە هەموو بەهایەک هێرشی دەکەنە سەر چینی پزیشکان.
داواکارین لە بەڕێزتان کە تا زووە وەڵامی خێرای داواکارییەکانمان بدەنەوە.
گیانی دکتۆر قەحتان شاد بێت و کۆتا جێگەی بەهەشتیی نەبڕاوە بێت.
٢٠٢٥/٣/٢٣ پزیشکانی کوردستان -

ژمارەی خوێندراو : 45 جار