سەیرو سەمەرەی چیرۆکی دروستکردن و پاسەوانیکردنی گۆڕەکەی حافز ئەسەد، دەریدەخات هەموو سەرکردەکانی رۆژهەڵات چەندە داماوو گەمژانە بیردەکەنەوە! هەریەکەیان کەدەمرێت چۆن تەنها ئاواتی ئەوەیە سەر شاخێک یان گردۆڵکەیەک ببێتە مەنزڵگای! حەزدەکات جوانترین ئارامگای هەبێت! بەحسابی پوچی خۆی بۆئەوەی تیا ئارام بێت و بحەوێتەوە! بۆئەوەی ببێت بە جێگای سەردانی خەڵکی و خەڵکی لەپاش مردنیشی لێی بترسن، سەردانی بکەن، وەک ئەوکاتەی کەلەژیاندابوو بەهەمان شێوە دوای مردنیشی ناوی بهێنن!
ئەمە حکایەتی ئاواتی نەخۆشی سەرکردەی رۆژهەڵاتە بەوانەشی کە بەحساب نیشتیمانپەروەرو دیمۆکراتخوازن، ئەوانەشیان کە دیکتاتۆرن وەک ئەسەدی باوک،!
شەش ساڵ پێش ئەوەی حافز ئەسەد بمرێت، رێک دوای مردنی باسلي کوڕە گەورەی لە ١٩٩٤، بەحادیسەی سەیارە ئەم سەرکردە دیکتاتۆرە کاری بۆ ئەوەکردووە چۆن گۆڕستانێکی تایبەت بۆ خۆی و خێزانەکەی بنیات بنێت بەجۆرێک کەلە تەلارسازیدا وێنەی نەبێت، لەگەڵئەوەشدا وەک پەرستگایەکی ئاینی سەیری بکەن!
حافز ئەسەد، لەبنەرەتدا فکرەی ئەم قەبرەی خۆی لەهندستانەوە هێناوە لە پەرستگای خواکانی ئەوانەوە، کارەکەی سپاردووە بەتەلارسازێک کەنەیهێشتوە کەس ناوی بزانێت! جۆری رۆشتنە ژوورەوەی پەرستگاکە بەجۆرێک بووە کە ناتوانیت لەکاتی هاتنەدەرەوەشتدا بەهیچ جۆرێک پشت لە حافزکەیت دوای مردنیشی، گۆری منداڵ و خێزانەکەی و دایکی هەریەکە لە سوچێک و گۆڕی خۆشی لەناوەراستیاندا!
(شوێن گۆڕی بۆ بەشارو ماهرو بوشرای کچیشی تیا دیاریکردبوو)
حکومەتی بەعسی سوری یەک کەتیبەی ٦٠٠ کەسی وەک پاسەوان بۆ ئەم گۆڕەی ئەسەد تەرخانکردبوو لە لازقیەو ناوی لێنابوو کەتیبەی گۆڕستان!
بەڵام کۆتاییەکەی چیمان بینی؟!
بینیمان منداڵە وردکە میزدەکەنە ئەو مەعبەدەی بەعس! دەیسوتێنن! بەرلەقەی دەدەن و تفی تێدەکەن! وەک دەڵێن هێشتا خاتریان گرتوە ئەگینا لەبەر خاتری موراعاتە دینیەکە نەبوایە ئیسک و پروسکیشیان لەو گۆڕە دەردەهێناو میزیان پێدادەکرد ، وەک چۆن میزیان کرد بەدەم و چاوی پەیکەرەکانیدا!
ئەمە پەیامێکی روونە بۆ هەموو سەرکردە نەخۆشەکانی رۆژهەڵات کە خەون بە گۆڕستانی راقی و بێوێنەوە دەبینن، بزانن رۆژێک دێت سەرەی هەمووتان دێت ئەوانەی کەلەسەرەوە دەتانپارێزن هەرکە دەسەڵاتیان نەما، ئێوە لە گۆرەکەشتانا بن خەڵکی تۆڵەی چەند ساڵەی ستەم و دزی و درۆو فێلەکانی خۆیانتان لێدەکاتەوە و بەر تف ونەفرەتتان دەدەن!
بۆیە باشترین شت بۆ سەرکردەی عاقڵ ئەوەیە، مۆنۆمێنتێک لەدڵی خەڵکیدا دروسبکات بەکاری باش و خزمەت کەخەڵکی هەموو چرکەیەک یادی بکەنەوە سەدان ساڵ دوای مردنیشی، نەک گۆڕی گرانبەهاو لەسەر ئەم گردو ئەو شاخ!