"سەری زۆرە لە بەر زۆریی سەرانی بێ سەرە ئەمڕۆ"
عەممار حەکیم، تەمەن، ٥٤ساڵ، لە ساڵی ۲۰۰۹ پۆستی باڵای سیاسی پێدەدرێ لە دوای کۆچی دوایی باوکی، کەسایەتی سیاسی و بەرپرسێکی باڵای عەرەبی عێراقی شیعە و سەرۆکی ڕەوتێکی سیاسی کە لە بەرواری ۲٤-۷-۲۰۱۷ درووست بووە، دوور لە داب نەریت و کولتور و مەزهەب و زمانی ئێمەی کورد، دوو ڕۆژە ماڵ بە ماڵ و شار بەشار، بارەگای حزب و لایەنی سیاسی و ڕێکخراو بە ڕێکخڕاو و ماڵی سەرۆک عەشرەت و دیوەخان و ناوەندی ئەکادیمی و زانستی و دینی نەما سەری پیا نەکات زیاد لە ۳۰ شوێن.
لە کاتێکدا نە هێزێکی زەبەلاحمان بینی نە ڕۆژێک پێش ئەوەی بچێتە ئەو شوێنانە، هێز جێگیر بکرێت و بیپارێزن، نە بە هەلی کۆپتەر هاتوچۆی کرد، نە بە مانۆڕی سەربازی.
کەچی ئەوانەی خۆشمان دەڵێی مانگی شەرمێیانە، سی و دوساڵە بەرپرسی ئەم وڵاتەن تا ئێستا هەندێ شار و شارۆچکە هەیە مەگەر لە ڕێگەی گۆگڵ ئەپ و ڕاستەوخۆی تیڤییەکانەوە بیبینن.......
ئاخۆ لە ماوەی ساڵانی ڕابردوو، هیچ بەرپرسێکی باڵای کوردستان بە تایبەتی لە دوای ۲۰۰۳، بۆ ناساندنی مەینەتییەکانی گەلی کورد ئامادەبوون ئەم جۆرە سەردانانە ئەنجام بدەن لە ناوچەکانی ناوەڕاست و خوارووی عێراق، کە هەمووان دەزانین چی مەینەتی بەسەر ئەم میللەتەدا هاتووە لەلایەن عەرەبەوە ئەنجام دراوە.
هەرچەندە تێبینیم هەیە لەسەر ئەم جۆرە سەردانانە بۆ ئەمڕۆی بارودۆخی سیاسی و پەرتەوازەیی کورد، کە دڵنیام لە داهاتوودا هەندێ لە مەترسییەکانی ئەم جۆرە سەردانیانە دەردەکەون، جاران دەمان وت جگە لە دامەزراوە فەڕمییەکان هەق نیە هەندێ پەیوەندی ناوخۆیی و دەرەکی درووست بکرێ، بەڵام نەک حزبەکان بەو کارە نەوەستان، ئێستا عەشرەت و خێڵ و حزب و ڕێکخراو و ناوەندە ئەکادیمی و سمبولە نەتەوایەتییەکانیش دەستیان بەم کارە کردووە.....
دڵنیام هاتنی عەممار حەکیم لەم کاتەدا، کە ناوچەکە گۆڕانکاری بەخۆوە بینیوە بە تایبەتی دوای ڕووخانی حکومەتی بەشار ئەسەد ، هەڕەشەکانی ئەمریکا لەسەر گرووپە شیعەکان، بێ هۆکار نیە و ئامانجی لە پشتەوەیە، بەڵام ئێمەی کوردیش، وێڕای قۆستنەوەی دەرفەتەکان، بە فریاد ڕەسی دەزانین و داوای چاککردنی مووچە و بارودۆخی ئابووری و سیاسی نێوان هەرێم و بەغدای لێدەکەین لە کاتێکدا خاوەنی ۱۲ کورسی پەڕلەمانییە.
ئاخۆ عەممار حەکیم چی بە دەستە لە وڵاتێک کە سەرۆک کۆمارەکەی کورد بێت ئاخۆ لە عێراقی ئێستادا عەممار حەکیم باڵا دەستترە یا کوتلەی کوردی، سەرۆک کۆمار و جێگری سەرۆک وەزیران و جێگری پەڕلەمان و دەیان پۆستی تر، لەوەتەی هەیە دەسەڵاتی حکومەت بە دەست شیعەوە بووە ئایا پێشتر حەکیم چی کردووە لە چارەسەری گرفتەکان تا ئەمجارەش بیکات. 
پرسیارێکم لەلا درووست بووە، ئەم گەڕان و دیدار و بەسەرکردنەوانە تەنها سنوری سلێمانی و هەڵەبجە دەگرێتەوە، یا جەنابیان سەردانی هەولێر و دهۆکیش دەکات لەگەڵ سەرۆک عەشیرەت و ناوەندە ئەکادیمیی و زانستی و دینییەکان و ڕێکخراو و دیوەخانەکانی ئەوێش کۆ دەبێتەوە، ئەگەر نەکرا کەواتە بەشێک لە ئامانجی هاتنەکەی ئاشکرا دەبێت.
هەمیشە لەگەڵ ئاشتی و برایەتی و پێکەوە ژیانی نێوان گەلان و ئاین و مەزهەبەکانم بەڵام نەک هەڵخەڵەتاندن و بە گێل سەیرکردنمان...
د. سەباح شێخ موحەممەد بەرزنجی جوانی فەرمووە..

دەمێکە من وتوومە کوردی ئێمە بۆیە یەخسیرە ؛
لەلایەک ڕاوچییە بۆخۆی، لەلایەک عەینی نێچیرە!.
سەری زۆرە لە بەر زۆریی سەرانی بێ سەرە ئەمڕۆ.
لەگشت لایەک بەکاری دێنن و ئاو بێنە جا بیشۆ !!.

بۆیە دەڵێم، خوایە، کوردستان لە خەمساردی بەرپرسان و فێڵ و تەڵەکەی کەسانی تر بپارێزە.