بەغدا (٩٥٠ ملیار) دیناری بۆ مووچەى مانگى (یەک) نارد، مووچەی مانگی (دوانزە) لە ئەستۆی هەرێمە، بەمجۆرە:
بە پێى ڕاگەیەنراوى فەرمى حکومەتى ماوەبەسەرچوو، بەغدا بڕى (٩٥٠ ملیار) دینارى بۆ مووچەى مانگى یەک خستە سەر ئەژمارى وەزارەتى دارایى هەرێم، بە بێئەوەى هیچ بەرپرسێکی هەرێم هیچ ئاماژەیەک بە مووچەى مانگى (دوانزە) بکەن.
مووچەى مانگى دوانزە لە ئەستۆى حکومەتى ماوەبەسەرچووى هەرێمە، بەغدا بە بەڵگە خۆى لەو بەرپرسیارێتیە هێناوەتە دەرەوە، ئەوەش بە دوو هۆکار:
یەک/ بۆ مووچەى مانگى دوانزە وەزارەتى دارایى عێراق بڕى (٤٤١ میار) دینارى ناردووەو وەزارەتى دارایى هەرێم ئەو پارەیەى وەرگرتووە.
دوو/ بە پێى ڕاگەیەنراوەکانى وەزارەتى دارایى عێراق، هەرێمى کوردستان ماوەى حەوت مانگى ساڵى (٢٠٢٤) هیچ بڕە پارەیەکى لە داهاتى ناوخۆ بۆ بەغدا نەناردووە، کە دەبوو بۆ هەر مانگێک نزیکەى (٨٠ ملیار) دینار بنێرێت کە بۆ حەوت مانگەکە دەکاتە (٥٦٠ میار) دینار.
بەمجۆرە ئەو دوو بڕە پارەیە دەکاتە زیاتر لە یەک ترلیۆن دینار کە بەشى تەواوەتى مووچەى مانگى کانوونى یەکەم (دوانزە)ى ساڵى ڕابردوو دەکات.
واتە بە هەموو پێوەرێکى ژمێریاریى و یاسایى ئەرکى حکومەتى ماوەبەسەرچووى هەرێمە مووچەى مانگى دوانزە دابەش بکات لەو پارەیەى بەغدا ناردوویەتى و لەوەشى کە دەبوو بینێرێت بۆ بەغداو نەیناردووەتەوە، هەرێم ئەگەر پشکى بەغداى لە داهاتى ناوخۆ نەناردووە بۆ بەغدا دەبێت بۆ مووچەى مووچەخۆرانى هەرێم خەرجى بکات.
پارەو داهاتی ناوخۆ موڵکی خەڵکی کوردستانە نەوەک دوو حزبی سیاسی، مووچە قوتی منداڵی مووچەخۆرەو نابێت کەس دەست لە مافی خۆی و منداڵەکانی هەڵگرێت.
بۆیە پێویستە هەموو خەڵکى کوردستان ئەم ڕاستیە بزانێت و هەموو پێکەوە کاربکەین بۆ فشارکردن تا هەرێم دەچێتە ژێربارى بەرپرسیارێتی مووچەى مانگى دوانزەو خەرجى دەکات.
عومەر گوڵپى
٤ى ٢ى ٢٠٢٥