دەقى بڵاوکراوەکەى مامۆستا تاهیر بخوێنەرەوە:
بەناوی خوای بەرز و بێ هاوتا
بۆ بەڕێزان لە وەزارەت و گەنجینە و بەڕێوە بەرایەتییە پەیوەندیدارەکان: سڵاوێکی ڕەمەزانانەتان لێبێت..
بەڕێزان: نازانم ئاگادارن پێنج شەش مەوالید لە "کون فەیەکون"ێکا خانەنشین کران، پەڕاوی خانەنشینی و پەڕاوی خەرجکردنی موچەی ١٨٠ ڕۆژی مۆڵەتی کۆکراوەمان بۆکرا، بۆ ئەوەی وەکو بەرکوڵێک ئەو بڕە پارەیەمان بۆ خەرج بکەن، تا جەڵدەی بێپارەیی و موچە وەرنەگرتن لێمان نەدات، ئێمە لە ٣١-١٢-٢٠٢٤ وە خانەنشین بووین، تەنها موچەی مانگی ١١ ی ٢٠٢٤ مان وەگرتووە، بەم بەرە جەژنانە ماڵ و منداڵی ئێمەش مرۆڤن پێویستی ڕۆژانەیان هەیە، واڕەمەزانمان بەقەرز بەسەر برد، جەژن تەنگی پێهەڵچنیوین، ئیتر منداڵ لە جەژندا سۆعبەت نازانێ دەڵێ بابێ جل و بەرگ پێڵاو پارەی ڕۆژانە، دەرمان ..
بۆیە ئەم نامە کراوەیەم بڵاوکردەوە کەس خۆی کەڕ نەکات، دڵنیا بن هەموومان لەم شەوانی قەدر و دۆعاگیرا بوونەدا دەست دەکەین بە دۆعا ئەگەر تەکانێک نەدەن و فریا نەکەون (لقد اعذر من انذر.....).
هەر وتم باقسە نەکەم کەچی خۆتان کردوە بە کەڕڕەی شەربەت، کاکە ئێمە مەلاین خۆ مەلائیکە نین ناو ئاو نەخۆین، تکایە بە ئیسعافی فەوری ئەو موچانەمان بۆ بنێرن و خۆتان لە ئاهو نزولەی مامۆستای ڕیشسپی دەست بە دەست نوێژ و بەڕۆژو و بپارێزن.
داواکار
خانەنشین کراوێکی گیرفان خاڵی ئەم مەملەکەتە...