قەوارەی ئیسرائیل پێش ئەوەی دروست بکرێت، چواردەورەکەی قایم کرا، هەموو ئەو وڵاتانەی لە لایەکەوە دراوسێی بوون لاواز و دەستەمۆ کران و لە هەر یەکێکیاندا بەکرێگیراوێک کرایە حاکم، هەر بۆیە کاتێ لە یەکەم هەڵبژاردنی دوای سەرکەوتنی شۆڕشی یەنایەری میسری ٢٠١١، بزاوتی "ئیخوان موسلیمین" بردیانەوە و "محەمەد مورسی"ی بوو بە سەرۆککۆمار؛ مرۆڤی ئاقڵ دەیزانی ئەگەر ئیخوان وریا نەبێت، زۆری پێ ناچێت ئینقلابی بەسەردا دەکرێت، هەر وایش دەرچوو، ئینقلاب کرا و هەموو شتێک گەڕێندرایەوە بۆ خاڵی سفر، بۆ؟ چونکە بوونی میسرێکی بەهێز و سەربەخۆ، واتە بوونی مەرزێکی فرەوانی کراوە لەگەڵ قەوارەیەکی دروستکراو و دەستپێوەگیراودا، بوونی دەرگایەک کە دەکرێت بای ڕووخانی ئیسرائیلی لێوە بێتە ژوورەوە.
چوار مانگ لەمەوبەر شۆڕشی سووریا سەڕی گرت و "بەشار ئەسەدی میراتگری "حافظ"ى باوكی و دوا فەرمانڕەوای حیزبی بەعس کە زیاتر لە پەنجا ساڵ بوو پاسەوانییان لە قەوارەی ئیسرائیل دەکرد، ڕای کرد.
ئەمە بۆ خۆی مەترسییەکی گەورەیە بۆ سەر ئیسرائیل، چونکە لایەکی ئەو دیوارەی بە دەوریدا هەڵچنرا بوو ڕووخا، هەر ئەوەندەیش نا، ئەو هێزەی هاتە جێی حاکمی لاواز و ترسێنراوی دیمەشق، هێزێکی ڕادیکاڵ و حەزلەشەڕ و توندی ئیسلامییە، کە ئەدەبییاتی پڕە لە باسی ڕابردووی جەنگ لەگەڵ جوولەکە "خەیبەر و بەنو قورەیزە" و داهاتووی جەنگ لەگەڵ جوولەکە "ينادي الحجر والشجر هذا يهودي خلفي فتعال فاقتله". ئەم هێزە وەک ئیخوان نییە کە دروشمی "سلمیتنا أقوى من الرصاص" بەرز بکاتەوە، بەڵکوو زمانحاڵی دروشمی "کێ بیهەوێت بمکوژێت دەیکوژم" دەڵێتەوە، ئەو بەناو خوێن و سەر تەرمدا هاتووە تا گەیشتووەتە ئەم جێگەیە، پەندیشی لە شۆڕشی پێچەوانەی میسر و لیبیا و توونس وەرگرتووە و دەزانێت چەند پیلانی جۆراوجۆری بۆ ئامادە کراوە، لەوەیش خراپتر، ئەم هێزە زۆرترینی تەمەنی لەناوشەڕدا بردووەتە سەر و ناتوانێت بە بێ شەڕ دابنیشێت.. هەموو ئەمانە وا دەکەن ئیسرائیل بترسێت و ناهەقیشی نییە لەوەی بترسێت. هەربۆیە لە یەکەم ڕۆژی ڕاکردنی بەشاردا سوپای ئیسرائیل بەشێکی دیکەی خاکی سووریای داگیر کرد و لە لەو ڕۆژەیشەوە گەف لە دەسەڵاتی نوێی ئەو وڵاتە دەکات.
دەسەڵاتی نوێی سووریا دەبێت یەکێک لەم بژاردانە هەڵبژێرێت:
مل بۆ ئیسرائیل کەچ بکات و دەست لەو بەشەی خاکی وڵاتەکەی کە سوپای ئیسرائیل پێشتر "بەرزاییەکانی جۆلان" و لەم دواییانەدا "جبل الشیخ بەرەو نزیکی دیمەشق" داگیری کردوون هەڵبگرێت. بەمەیش هەموو متمانەیەکی ناوخۆیی و دەرەکی لە دەست دەدات، یان وردە وردە خۆی کۆ بکاتەوە و پێگەی بەهێز بکات و چاوەڕێی دەرفەت بێت بۆ بەگژداچوونەوەی ئیسرائیل.
ئێستا کە جارێ هیچی نەکردووە و هیچ هەنگاوێکی نەناوە، ئیسرائیل هەر لێی بەگومانە و هەوڵی لەناوبردنی دەدات، چونکە لەوە دڵنیایە وەها هێزێک هەرگیز نابێت بە دۆست و باشتر وایە تا نەمامە هەڵبکێشرێت، لێ مەرج نییە هەموو شتێک هەموو دەمێک بە دڵی وی بڕواتە پێش.
ترسی ئیسرائیل لەو کەلێنەی لە لای سووریاوە بەسەریدا کراوەتەوە ئەوەیە لە داهاتوودا ببێتە کەلەبەری جێی تەماحی نەیارەکانی و وەک موگناتیز هەرچی هێزی دژە ئیسرائیل هەیە ڕابکێشێت!
بە ڕووکەش ئێستا ئیسرائیل لە لوتکەی هێزدایە و نەیارەکانیشی لەوپەڕی لاوازیدان، ئێرانی هەڵگری دروشمی بەرەنگاری بووەتە جێی بەزەیی و خوا خوایەتی بەسەریدا نەدرێت، پەلوپۆکانیشی یان شکێنراون یان لەوەدان بشکێنرێن و لەناو ببرێن. بەڵام یاسایەکی گەردوونی هەیە سەلماندوویەتی پەتی ستەم هەمیشە لە ئەستووریدا دەبڕدرێت!
لە قورئاندا دەستەواژەی "فأخذناهم بغتة وهم لا يشعرون" چەندین جار پاتە بووەتەوە. وەک چۆن ڕژێمەکەی ئەسەد خەریک بوو دەگەڕایەوە و وای زانیبوو مەترسیی لەسەر نەماوە، کەچی لەپڕ لە ڕەگوڕیشە دەرکرا، دۆخەکە وای پیشان دەدات نموونەی دیکەی لەو جۆرەیش بەم نزیکانە ببینین.
بیرتان نەچێت ڕووخانی هێزی جوولەکە لە قورئاندا لە دوو دیوەوە ڕوو دەدات: لە ناوەوە، ئینجا لە دیوی دەرەوە! "وَقَذَفَ فِي قُلُوبِهِمُ الرُّعْبَ ۚ يُخْرِبُونَ بُيُوتَهُم بِأَيْدِيهِمْ وَأَيْدِي الْمُؤْمِنِينَ فَاعْتَبِرُوا يَا أُولِي الْأَبْصَارِ" الحشر: ٢.
دەبێت هەمیشە چاوێکمان لەسەر ناوخۆی پڕ لە گرێی ئەو قەوارە زۆڵەکە بێت.