شاخ پرێس:
ھەریەکە لە حکومەتی عێراق و حکومەتی ھەرێمی کوردستان لەدوای سەردانی ھەفتەی ڕابردووی مەسرور بارزانی بۆ بەغدا و کۆبوونەوەی لەگەڵ عادل عەبدولمەھدی سەرۆک وەزیرانی عێراق، لە ڕێکەوتنی کۆتایی نزیکبوونەتەوە و پەرلەمانتارێکی بەغداش وردەکاریی ھەنگاوەکانی ڕێکەوتنی ھەولێر و بەغدا بڵاودەکاتەوە .
ئەمجەد عەقابی ئەندامی ئەنجومەنی نوێنەرانی عێراق بە ڕۆژنامەی سەباح ی زمانحاڵی حکومەتی عێراقی ڕاگەیاندووە "لیژنەیەکی ھاوبەش لەنێوان ھەردوو حکومەتی ھەولێر و بەغدا پێکھێنراوە بۆ دەستپێکردن بە ھەنگاوەکانی ڕادەستکردنی ٢٥٠ ھەزار بەرمیل نەوتی ڕۆژانەی ھەرێمی کوردستان بە حکومەتی ناوەند و کۆمپانیای سۆمۆ" .
بەوتەی عەقابی "لیژنە ھاوبەشەکە لەنێوان ھەریەکە لە وەزارەتی نەوتی عێراق و وەزارەتی سامانە سروشتییەکانی ھەرێمی کوردستان پێکھێنراوە بۆ تاوتوێکردنی ئەو بڕە نەوتەی لە یاسای بودجەدا دیاریکراوە و پێویستە ھەرێمی کوردستان بیداتە کۆمپانیای سۆمۆی عێراقی" .
ئەو ئەندامەی ئەنجومەنی نوێنەرانی عێراق ئاماژەیبەوەشکردووە "بەرپرسانی ھەرێم بە بەغدایان وتووە تا ئێستا کە نەوت ڕادەستنەکراوە بە ھۆی درەنگ پێکھێنانی کابینەی نوێی حکومەتی ھەرێمی کوردستان بووە و لە ئێستاوە ئامادەن نەوتەکە و داھاتەکەشی لەسەرەتای ئەمساڵەوە تا ئێستا ڕادەستی کۆمپانیای سۆمۆ بکات" .
ژمارەی خوێندراو : 367 جار