عەلمانیەتی گەندەڵ
و كۆنە ئیسلامیی خانەنشین چی كۆیان دەكاتەوە ؟
ئەمە وێنەی گۆڤاری
گوڵانی سەربە پارتی دیموكراتی كوردستانە، ئەمەش دیبەیتێكی ناوخۆیی ئەو حزبەیە كە
بەشی ڕۆشنبیریی و ڕاگەیاندنەكەی بۆ ژمارەیەك كۆنە ئیسلامیی و كادری پارتی
سازیكردووە .
لەناو ئەم هۆڵەی
كە ئەم كۆنە ئیسلامیی و پارتییانەی تێدا مۆڵدراوە، باس باسی مەترسیی ئیسلامییەكانە،
لە دیدی ئەم كۆنە ئیسلامییانەدا "لە هەر شوێنێك ئیسلامیی سیاسیی بوونی هەبێت،
چارەنوسی ئەو وڵاتە كاولبوونە" .
كارمان بە وڵاتی
دیكە نیە و لێدەگەڕێین بۆ خەڵكەكەی، دێینەوە بۆ ئەو هەرێمەی كە 32 ساڵە دوو هێزی
عەلمانیی حوكمڕان و دەسەڵاتدارن تیایدا، بزانین لە سایەی "حكومەت و سەرۆك
وەزیرانە خۆڕاگرەكەی" ئەم دیبەیتەوانانەوە بووەتە چ وێرانە و كاولەیەك ؟
ئەمە ئارینی كوڕی
مەسرور بارزانیی سەرۆكی حكومەتی كاربەڕێكەری هەرێمە، تەمەنی كەمتر لە 20 ساڵە و،
خاوەنی گرانبەهاترین ئۆتۆمبێل و ئەسپی فەرەنسی و بەریتانی و عەرەبییە، دەوترێت
هێندەی لەناو فڕۆكەیە، ئەوەندە لەسەر زەوی نیە .
ئەمەش ئیدریسی
كوڕی نێچیرڤان بارزانیی سەرۆكی ماوەبەسەرچووی هەرێمی كوردستانە، لە ژمارەی
ئۆتۆمبێل و پارەی سەریەك نراو و كۆمپانیا و بانك و ڕێكخراو و زانكۆدا، ڕكابەری
ئارینی كوڕە مام دەكات .
ئەم دوو هەرزەكارە
خۆشگوزەرانە، بە پیشاندانی بەشێك لە ژیانی شاهانەیان لە سۆشیال میدیا، بە ئازار و
میحنەت و بێكاریی و برسێتیی و هەژاری ئەو دەیان هەزار گەنجە ڕادەبوێرن كە لە سایەی
حوكمڕانییە پڕ گەندەڵیی و شكستخواردووەكەی باوكیانەوە، دینارێك لە گیرفانیاندا نیە
.
ئەمەش مێرمناڵێكی
شارۆچكەی قەڵادزەیە، تەمەنی تەنها 14 ساڵە و، تەلبەندی نیشتمانی بچڕاند و خۆی لە
زیندانە گەورەكەی باوكی "ئارین و ئیدریس" ڕزگاركردووە و ئێستا لە
سنورەكانی یۆنان، لە چاوەڕوانی ڕەحمەتی قاچاخچیەكدایە تا بیگەیەنێتە ئەو وڵاتەی
"شازادە نەوتاوییەكانی هەرێم" دەسەڵاتیان بەسەریدا نیە .
ئێرە یەكێكە لە
یاریگاكانی هەولێر و سلێمانی، جمەی دێت لە مێرمناڵ و گەنج، سیمای هەر یەكێكیان
دەبینی، لێوانلێوە لە ئەدەب و بەرزی ڕەوشت، ئەمانە بۆ وەرگرتنی موچە
كۆنەبوونەتەوە، ئاهەنگ و تێكەڵی و ڕەشبەڵەكیش نیە، ئەمە تاقیكردنەوەیە لە فەرموودەكانی
پێغەمبەر موحەممەد "درودی خوای لەسەر بێت" .
ڕێكخەر و
سەرپەرشتیارانی ئەم پرۆژانە ئیسلامییەكانن، هەر شار و شارۆچكەیەك دەگریت، هەزاران
گەنجیان لەخۆیان گرتووە و، لەڕێی بونیادی كەسایەتی و پەروەردەكردنیانەوە، بەر بە
داڕوخانی ئەم كۆمەڵگەیە دەگرن، كە لە سایەی دەسەڵاتی عەلمانییەكاندا، ڕۆژبەڕۆژ باڕ
و نێرگەلەخانە قومارخانە و سەرەنجامیش زیندانەكان جمەیان دێت لە گەنجی سەرگەردان .
"قەومی لوط" نابوتترین و قێزەونترین بوون لەسەر
زەویدا، خودای گەورە پێغەمبەرێكی بۆ ناردن تا واز لە بەدڕەوشتی و لادان بێنن و
بگەڕێنەوە سەر فیترەتی پاكی مرۆڤ، پاش چەندین ساڵ هەوڵدان و ماندوبوون و بانگەواز،
ئەو گەلە لادەر و بەدڕەوشتە بەیەكتریان دەوت " أَخْرِجُوا
آلَ لُوطٍ مِّن قَرْيَتِكُمْ إِنَّهُمْ أُنَاسٌ يَتَطَهَّرُونَ" لوط و هاوەڵەكانی لەم وڵاتە دەربكەن، ئەوانە بۆ
ئەوە ناشێن لەناوماندا بژین و دراسێمان بن، ئەمانە دەیانەوێت بە پاكی بژین .
ململانێی حەق و
ناحەق، ڕاست و درۆ، ڕەش و سپی، چاكە و خراپە، كوفر و ئیمان، لەگەڵ دروستبوونی
مرۆڤایەتی هەبووە و بەردەوامیش دەبێت، ئاساییە بۆ هێزە عەلمانییەكان كە هێز و
ڕێكخراو و ڕەوت و فیكری ئیسلامیی تەنانەت مسوڵمانانیش بە مەترسیی بۆسەر بوون و
مانەوەی خۆیان بزانن .
دیاردە نامۆ و
نائاساییەكەی ئەم دیمەنە، بوونی تاقمێك مەلا و كۆنە ئیسلامیی خانەنشینە كە بە
هەمان ئاوازی هێزێكی چەپ و عەلمانیی گەندەڵ دەخوێنن، كە چەند ساڵێك پیشتر خۆیان بە
بەدیلی ئەو دەسەڵات و ڕژێمە عەلمانییە زانیوە و ئێستا ئاواز و ئاراستەیان گۆڕیوە و
نازانرێت سبەی ئاراستەكەیان ڕوو لە كوێی دیكە دەكات ؟
كێ وڵاتی كاول
كردووە ؟! ....
ژمارەی خوێندراو : 78 جار