لە رۆژێكی وەكو ئەمڕۆ پێش 30 ساڵ لە 1989.8.25
كەشتی ئاسمانی (ڤۆیاجەر 2) گەیشتە نزیكترین خاڵ لە هەسارەی زەبەلاحی گازیی بەستووی (نێپتون) 
---------------------------------------------------------------------------
لەو دیمەنەدا، فەلەكناسان بۆ یەكەمجار لە مێژوودا، دوای دۆزینەوەی بۆ یەكەمجاری لەلایەن هەردوو فەلەكناس (یۆهان گال و ئۆربان لی ڤیرێر) لە 1846.9.23 ەوە وردەكارییەكانی ئەو جیهانە دوورەیان بینی، وەك (پەڵە تاریكە مەزنەكە – Great Dark Spot) كە لە دواییدا دەركەوت بریتی بوو لە گێژەڵووكەیەكی زۆر بەهێزو مەزن لەنێو بەرگە هەوایەكەی و هەروەها چەند هێڵێكی گەشی رەنگ سپی و شینی كراوەش بینران، كە دەركەوت بریتین لە چینە هەوری پاشكۆی خودی ئەو گێژەڵووكەیە.
پاشان پسپۆڕان زۆر بە وردی و كارامەیی رێڕەوی كەشتی (ڤۆیاجەر 2) یان دەستكاری كردو لاریان كردەوە تا نزیك ببێتەوە لە گەورەترین و ناودارترین پاشكۆیەكانی كە ناسراوە بە (ترایتۆن) و لەوێش چەندەها راستی سەرسوڕهێنەری ئەو پاشكۆیەیان بۆ دەركەوت، وەك دۆزینەوەی كان و گڕكانی سەهۆڵهاوێژ، نەوەك ئاوی كوڵاوو گڕتاو!.
هەر لەسەر رووی (ترایتۆن) دا نزمترین پلەی گەرمیی لەسەر رووی تەنێكی ئاسمانی نێو سیستەمی خۆردا تۆماركرا كە ( 235 - ( پلە بوو لە ژێر سفری سیلیزیدا.
ئەو كاتە، ئەو دیمەنانە لە دووریی 2 ملیارو 900 ملیۆن كیلۆمەتر لە زەوییەوە وەرگیران و ئێستاش كەشتی (ڤۆیاجەر 2) بە مەودای 21 ملیار كیلۆمەتر لێمانەوە دوورە. 
---------------------------------------------------------------------------
وەرگێڕانی: ئەژی چەتۆ حەسەن / بەرپرسی بەشی راگەیاندنی بەڕێوەبەرایەتی گشتی كەشناسی و بوومەلەرزەزانی هەرێم
سەرچاوە: سایتی NASA

ژمارەی خوێندراو : 420 جار