"ئاشتەوایی لەگەڵ هەمووان دەكەن"
 كۆمەڵی دادگەریی تیمێكی بۆ خۆڕێكخستنەوە دروستكرد
#روون_میدیا
ئەمڕۆ شەممە، 29 ی 11 ی 2025، لە شاری هەولێر، ئەنجومەنی سەركردایەتی كۆمەڵی دادگەریی كوردستان بە سەرۆكایەتی عەلی باپیر، سەرۆكی ئەو حزبە كۆبووەوە .
لەپاش كۆبوونەوەكە ڕاگەیەندراوێكی بڵاوكردەوە كە لە بەشێكیدا دەڵێت "سەركردایەتیی كۆمەڵی دادگەریی ‏كوردستان لە كۆبوونەوەی ئەمڕۆی خۆیدا و بەپێی هەلومەرجی سیاسی و لەسەر بناغەی ‏پەیڕەوی نێوخۆ بەرپرسی مەكتەب و مەڵبەندەكانی دیاریی كرد" .
تایبەت بۆ #روون_میدیا ، عەبدولستار مەجید، ئەندامی مەكتەبی سیاسیی كۆمەڵی دادگەریی وتی "لە كۆبوونەوەی ئەمڕۆدا چەند هەنگاوێك بۆ خۆڕێكخستنەوەی كۆمەڵ درا، هەنگاوی یەكەمیش، دووبارە داڕشتنەوەی پەیكەری ناوخۆ و دیاریكردنی بەرپرسی نوێ بوو بۆ مەڵبەند و مەكتەب و ئۆرگانەكان" .
ئەو ئەندامەی مەكتەبی سیاسیی كۆمەڵ ڕاشیگەیاند "هەندێك مەڵبەندمان هەیە بەرپرسەكانیان لە كۆنگرە دەنگی پێویستیان بۆ ئەندامێتی سەركردایەتی نوێ بەدەستنەهێناوە، ئەمڕۆ سەركردایەتی بڕیاریدا هەریەك لەو مەڵبەندانە كۆنفرانسی ناوچەییان بۆ ببەسترێت و كێیان پێ پەسەندە بۆ بەرپرسیارێتی مەڵبەندەكانیان، بە دەنگدان هەڵیبژێرن و سەركردایەتی پەسەندی دەكات" .
لە ساڵانی ڕابردوودا ژمارەیەك سەركردە و كادری كۆمەڵ لە حزبەكەیان دووركەوتنەوە و وازهێنانیان ڕاگەیاند، عەبدولستار مەجید دەڵێت "هەنگاوی دووەمی داهاتوومان، ئاشتەواییە لەگەڵ ئەو خوشك و برایانە و هەر كەسێكی دیكەش كە لە خۆمان بە نزیكی دەزانین" .
كۆمەڵ، لە كۆنگرەی چوارەمی خۆیەوە ناوی خۆی لە "كۆمەڵی ئیسلامیی"ـەوە بۆ "كۆمەڵی دادگەریی" گۆڕی .
عەبدولستار مەجید ئاشكرایكرد "لە كۆنگرەی پێنجەمدا دەنگ لەسەر ئەوە دراوە كە پاشگری (ئیسلامیی) بۆ كۆمەڵ بگەڕێندرێتەوە و ناوەكەی بكرێتەوە بە (كۆمەڵی ئیسلامیی) ئەمڕۆش ئەنجومەنی سەركردایەتی لیژنەیەكی پێكهێنا تا لەگەڵ كۆمسیۆنی باڵای هەڵبژاردنەكان قسە بكرێت"
كۆمەڵی دادگەریی یەكێكە لە هێزەكانی ئۆپۆزسیۆن لە هەرێمی كوردستان، لە پەرلەمانی كوردستان خاوەنی سێ كورسییە و بایكۆتی كردووە، لە ئەنجومەنی نوێنەرانی عێراقیش یەك كورسیی بەدەستهێنا .

ژمارەی خوێندراو : 117 جار