لە کاتێکدا گرژییەکانی نێوان واشنتن و تاران گەیشتوونەتە لوتکە، میدیاکانی ئەمریکا پەردە لەسەر هەوڵێکی ناوخۆیی بەرپرسانی باڵای ئیدارەی ترەمپ لادەدەن بۆ ڕێگریکردن لە هەڵگیرسانی جەنگ. بەپێی ڕاپۆرتەکان، نزیکترین کەسایەتییەکانی دەوروبەری دۆناڵد ترەمپ داوای فەراهەمکردنی دەرفەت بۆ دیپلۆماسی دەکەن.
ماڵپەڕی ئەکسیۆسی ئەمریکی بڵاویکردەوە، هەریەک لە ستیڤ ویتکۆف، نوێنەری ئەمریکا و جارێد کوشنەر، زاوای دۆناڵد ترەمپ، نامەیەکی هاوبەشیان ئاراستەی سەرۆک کردووە. لە نامەکەدا داوایان لێکردووە لە ئێستادا هیچ هێرشێکی سەربازی نەکرێتە سەر ئێران و لەبری ئەوە، بوار بە هەوڵە دیپلۆماسییەکان بدرێت.
ئەم دوو بەرپرسە کە سەرکردایەتی دانوستانەکان لەگەڵ تاران دەکەن، هاوشێوەی فەرماندە سەربازییەکان نیگەرانن لە لێکەوتەکانی هەر ڕووبەڕووبوونەوەیەکی چەکداری، ئەمەش لە کاتێکدایە کە جوڵە سەربازییەکانی ئەمریکا لە ڕۆژهەڵاتی ناوەڕاست بەردەوامن.
هۆشدارییەکانی پێنتاگۆن: "کەمیی تەقەمەنی و ماندوێتیی سەربازان"
لە لایەکی دیکەوە، دان کین، سەرۆکی ئەرکانی هاوبەشی سوپای ئەمریکا، هۆشدارییەکی توندی داوەتە کۆشکی سپی. بەپێی زانیارییەکان، کین لە کۆبوونەوەکانی ئەنجومەنی ئاسایشی نیشتمانیدا ئاماژەی بە چەند خاڵێکی مەترسیدار کردووە لەوانە:
کەمیی ته‌قه‌مه‌نی: نەمانی بڕی پێویست بۆ جەنگێکی درێژخایەن.
نەبوونی پشتیوانی: کەمبوونەوەی پشتیوانی هاوپەیمانان بۆ ئۆپەراسیۆنەکە.
لاوازیی بەرگری: ماندوێتی سەربازەکان و کەمبوونەوەی توانای بەرگریی ئاسمانی.
ئەم نیگەرانییانە تەنها لای سەرۆکی ئەرکان نین، بەڵکو بەرپرسانی دیکەی وەزارەتی بەرگری (پێنتاگۆن) هاوڕان کە هەر هێرشێک دەبێتە هۆی زیانی گەورە لەنێو هێزەکانی ئەمریکا و هاوپەیمانانیدا.
وەڵامی ترەمپ: "تاران بە ئاسانی تێکدەشکێنین"
سەرەڕای ئەم هۆشدارییە ناوخۆییانە، دۆناڵد ترەمپ، سەرۆکی ئەمریکا، هەڵوێستێکی توندی نیشانداوە. ترەمپ میدیاکانی وڵاتەکەی بە بڵاوکردنەوەی "ڕاپۆرتی ناڕاست" تۆمەتبار کرد و جەختی لەوە کردەوە کە هێزی سەربازی واشنتن لە ئاستێکدایە کە دەتوانێت لە هەر ململانێیەکدا "بە ئاسانی" تاران تێکبشکێنێت.

ژمارەی خوێندراو : 84 جار