ڕوون میدیا
 دوای هەڕەشە توندەکانی دۆناڵد تڕەمپ، سەرۆکی ئەمریکا، سەبارەت بە ئەگەری ڕێگریکردن لە گەڕانەوەی شاندی ئێرانی بۆ وڵاتەکەیان لە ئەگەری داخستنی گەرووی هورمز، گەڕی یەکەمی دانوستانە ڕاستەوخۆکانی نێوان واشنتن و تاران لە هاوینەهەواری "بۆرگنشتۆک" لە سویسرا، ڕووبەڕووی ئاڵۆزی و لێدوانی دژبەیەک بووەوە. لە کاتێکدا میدیا فەرمییەکانی ئێران باس لە جێهێشتنی شوێنی کۆبوونەوەکە دەکەن وەک نواندنی ناڕەزایەتی، سەرچاوە دیپلۆماسییە ڕۆژئاواییەکان دەڵێن دانوستانەکان هێشتا بەردەوامن.
محەمەد باقر قاڵیباف، سەرۆکی پەرلەمانی ئێران کە خۆی بەشداری دانوستانەکانە، لە وەڵامی هەڕەشەکانی تڕەمپدا ڕایگەیاند: "باشترە ئەمریکییەکان لە لێدوانەکانیاندا وریاتر بن، چونکە هێزەکانی ئێمە ئامادەن بە شێوازێکی دیکە وەڵامیان بدەنەوە." قاڵیباف جەختی کردەوە کە تاران هیچ بایەخێک بە هەڕەشەکانی واشنتن نادات و وتی: "ئەگەر ئەم هەڕەشەیانە سوودیان هەبووایە، ئەمریکا نەدەگەیشتە ئەم دۆخی دەستەوەستانییەی ئێستای؛ ئەوان هەرچەندە قسە بکەن، ئێمە لەسەر زەوی کار و جێبەجێکردنی خۆمان دەکەین."
ئەم کێشەیە دوای ئەوە سەریهەڵدا کە سوپای پاسدارانی ئێران ڕایگەیاند گەرووی هورمزیان بەڕووی هەموو کەشتییەکاندا داخستووە، وەک وەڵامێک بۆ بەردەوامی هێرشەکانی ئیسرائیل بۆ سەر لوبنان، کە تاران پێی وایە پێشێلکردنی ئەو یاداشتنامەیەیە کە لەگەڵ واشنتن واژۆ کراوە بۆ ڕاگرتنی شەڕ لە هەموو بەرەکانی جەنگدا.
تڕەمپ لە لێدوانێکدا بۆ کەناڵی "فۆکس نیوز" ڕایگەیاند: "ئەگەر ئێرانییەکان گەرووی هورمز دابخەن، وڵاتەکەیان لەناودەبرێت و دانوستانکارەکانیشیان ناتوانن بگەڕێنەوە وڵاتەکەیان." تڕەمپ ئاماژەی بەوەش کرد کە ئەمریکا دەتوانێت کۆنترۆڵی گەرووەکە بکات و پشکی %20ی نەوتەکە بۆ خۆی ببات. هەروەها هۆشداری دایە سەرۆکی ئێران کە وریای قسەکانی بێت سەبارەت بە پیتاندنی یۆرانیۆم، ئەگەرنا ئەمریکا دەست بەسەر تەواوی وڵاتەکەیدا دەگرێت.
سەرۆکی ئەمریکا لە پۆستێکدا لە تۆڕی کۆمەڵایەتی "ترووس سۆشیاڵ" داوای لە ئێران کرد دەستبەجێ بریکارەکانی لە لوبنان ڕابگرێت، ئەگەرنا بە توندی لێیان دەدرێتەوە وەک چۆن هەفتەی ڕابردوو کرا. تڕەمپ سەبارەت بە دۆخی ناوچەکە وتی: "نزیکین لەوەی دۆسیەی حیزبوڵا ڕادەستی سوریا بکەین و دەسەڵات بدەینە دەست ئەحمەد ئەلشەرع، سەرۆکی سوریا." هاوکات بێهیوایی خۆشی لە ئیسرائیل دەربڕی و وتی: "ئەوان ناتوانن هیچ بکەن بێجگە لە وێرانکردنی باڵەخانەکان لە لوبنان."
سەرەڕای ئەم گرژییانە، ئەندامێکی شاندی دانوستانکاری ئێران بە تەلەفزیۆنی فەرمی وڵاتەکەی ڕاگەیاندووە کە لە گەڕی یەکەمدا باسیان لەم بابەتانە کردووە:
لێخۆشبوونی کاتی لە سزاکانی سەر نەوتی ئێران و گەیشتن بە ڕەشنووسێکی کۆتایی لەو بارەیەوە.
پرسی داراییە بلۆککراوەکانی ئێران و ڕێوشوێنەکانی ئازادکردنیان.
شاندی ئێرانی جەختی کردووەتەوە کە تاران ئامادە نییە هاتوچۆ و دانوستان لەسەر هیچ بابەتێکی دیکە بکات، مەگەر دوای ئەوەی شەڕ و هێرشەکان لە لوبنان بە تەواوی کۆتاییان پێبێت.

ژمارەی خوێندراو : 98 جار