(گەنجێك خێزانەكەی قەتلوعام دەكات، پیاوێك لەكاتی دزیدا دەستگیركرا، مەساجخانەیەك سوتا و ژمارەیەك گەنجی تێدا بوونە قوربانیی، باوكێك لەسەر دەستدرێژیی بۆسەر كچەكەی خۆی دەستگیركرا، مێرمناڵێك بە تاوانی كێشانی مادەی هۆشبەر حوكمدرا). ئەمانە مانشێتی بەردەوامی میدیاكانی كوردستانە كە بەردەوام دووبارە دەبنەوە .

ئێستا دوو مۆدێلی پەروەردە لە كۆمەڵگەی كوردستاندا هەیە، مۆدێلێك كە خێزانێكی بێباك مناڵێك بەبێ لێپرسینەوە ڕەوانەی كۆڵان و بازاڕەكان دەكەن، كاتێك گەورە دەبێت چاو لە كافتریا و نێرگەلەخانەكاندا دەكاتەوە و، كە دواتر لە باڕو یانەكانی شەوانەدا دەگیرسێتەوە تا دواجار ئەنجامدانی تاوانێكی خەتەرناك پەلكێشی كونجی زیندانی دەكات" ژیانی دەبێتە بەڵا بۆ دەروربەر و مەرگ و نەمانیشی خۆشی و شادی. مۆدێلێكیش لە مزگەوتەكانەوە پەروەردە دەكرێت و سەر لەناوەندێكی ئیسلامییەوە دەردەكات ژیانی ەبێتە ئارامی بۆ دەروروبەر و مەرگ و نەمانیشی دەبێتە خەم و ژان و فرمێسك بۆ خەڵك .

بەپێی بەدواداچوونەكانی ڕوون میدیا، ڕێژەی ئەنجامدانی تاوان و بەلاڕێداچوون لەناو گەنجاندا بە رێژەی سەدا 20 زیادیكردووە، تاوانەكان جۆراوجۆرن كە خۆیان لە دزیكردن و پەلاماردان و قومار و دەستدرێژی سێكسی وتاوانە ئابڕوبەرەكانی دیكەدا دەبینێتەوە تا دەگاتە پیاوكوشتن .

بەدوایدا چووین و گەیشتینە وردەكاریی و سەرەداو و سەركوزشتەی ژیانی ئەو گەنجانەی بە كۆت و زنجیری یەكێك لەو تاوانانەوە فڕێدراونەتە كونجی زیندان، بۆمان دەركەوت ئەم گەنجانە لە ژن و پیاو، لە كچ و كوڕ، تەنانەت مێردمناڵ و نەوجوان ڕێگای زیندانیان لە باڕ و كافتریاكانەوە دۆزیوەتەوە و ئێستا بەنرخترین ڕۆژەكانی تەمەن لە تاریكترین شوێنەكانی شار بەسەر دەبەن .

ژنان و كچان لەم زەلكاوەدا دووجار بوونە قوربانیی، جارێك بە هاندان و یاخیكردنی لە خێزان لەلایەن باند و گروپ و چەند ڕێكخراوێكی بەناو مافی مرۆڤ و ژنانەوە، جارێكی دیكەش بە نوقمكردنیان لە تاوان، كە چارەنوسیان فڕێدرانە دەرەوەی خێزان و كەوتنیان لە كونجی زیندانە .

ئەمە مۆدێلی تاریك و ترسناكی یەكەمە
مۆدێلێك كە چەندین ڕێكخراو و باند و گروپ كۆمەڵگەی بۆ پەلكێش دەكەن

دوای ئەوەی بەهۆی ڕووداوی هاتووچۆوە بەسەختی بریندار دەبێت و زیاتر لە هەفتەیەك لە نەخۆشخانە لەژێر چاودێری چڕدا دەمێنێتەوە، شەوی ڕابردو كۆچی دواییكرد، گەنجێك بە مەرگی خۆی فرمێسكی لە چاوانی ئەوانەش ێنا كە تەنها لە ڕێگەی وێنەوە بینیویانە و ئاشنایەتیان لەگەڵیدا نەبووە .

ئەمە هەرێمە، گەنجێك لە مزگەوتەكانەوە چاوی دەكرێتەوە و بە پەروەردەیەكی ئیسلامییەوە ڕەوانەی كۆمەڵگە دەكرێت و، دەبێتە مامۆستای سەدان مناڵ و نەوجوان و بە فێركردن و لەبەركردنی فەرمودەكانی پێغەمبەری ئیسلام، ئاشنا و تامەزرۆی خۆشەویستی ئەخلاق و ئەدەبیان دەكات .

ئێستا لە هەرێمی كوردستان ژمارەیەك سەنتەر و ڕێكخراو و ناوەندی پەروەردەیی ئیسلامیی بونیان هەیە، لەهەریەكێك لەم ناوەندانە دەیان مامۆستا سەرقاڵی پەروەردە و پێگەیاندنی هەزاران نەوجوان و گەنجن لە هەردوو ڕەگەز، كە دواتر بەرهەمی ئەم ناوەند و مزگەوت و ڕێكخراوە ئیسلامییانە دەچێتەوە ناو كۆمەڵگە و دەبنەوە بەربەستی گەورەی بەردەم وبڵاوبونەوەی ئەو فەسادەی كە مناڵی هیچ خانەوادەیەك لە هەڕەشەی پارێزراو نابێت  .

شارەزایانی پەروەردە دەڵێن "ئەو گەنجانەی لەو ناوەند و ڕێكخراوە ئیسلامییانەدا پەروەردە بوون، باڵاترین نمونەكانی ئەدەب و زیرەكی و بەرزی ڕەوشتن لە ناوەندەكانی خوێندندا" ساڵانە و لەگەڵ ڕاگەیاندنی ئەنجامەكانی تاقیكردنەوەی پۆلی 12 شدا دەردەكەوێت كە خاوەن نمرە هەرە بەرزەكان، كوڕانی پەروەردەكراوی مزگەوت و كچانی باڵاپۆش و مایل بە ڕێكخراو و ناوەندێكی ئیسلامیین  .

ئەمەش مۆدێلی ڕوون و ڕەوانی دووەمە
مۆدێلێك كە هەمووان لەدەست و زمانی پارێزراون و، خێزانێكی تۆكمە و مزگەوتێكی ئاوەدان و چەندین مامۆستا و ڕێكرخراوی ئیسلامیی دەستیان لە دروستكردنیاندا هەیە

تۆی گەنج ئازادیت، ڕێگای یەكەمت دەوێت كە دەتگەیەنێتە بەردەم دەرگای زیندان و تەمەنێك ژیان بە حەسرەتی ژیانێكی سەربەرزانە، یان مۆدێلی دووەم هەڵدەبژێریت كە نەك ژیانت، مەرگ و مردنیشت دەبێتە شانازی بۆ خۆت و بنەماڵە و دەوروبەرت .

مەترسە و بریار بدە ......

ژمارەی خوێندراو : 269 جار