دۆناڵد ترەمپ،
سەرۆکی ئەمریکا ئه‌مڕۆ یەکشەممە داوای پێشکەوتنی دانوستانەکانی ئاگربەست لە شەڕی
غەززەی کرد و داوای کرد کە ڕێککەوتنێک بوەستێنرێت، کە شەڕ لە ململانێی 20 مانگەدا
ڕابگرێت، لەکاتێکدا وادیارە لایەنەکان لە ڕێککەوتن نزیکتر دەبنەوە.
بەرپرسێکی
ئیسرائیلی ڕایگه‌یاند، پلان دانراوه بۆ ئەوەی بنیامین نه‌ته‌نیاهۆ، سەرۆک
وەزیرانی ئیسرائیل لە هەفتەکانی داهاتودا گەشت بکات بۆ واشنتن دی سی، ئەوەش
نیشانەیە کە ڕەنگە جوڵە لەسەر گرێبەستێکی نوێ هەبێت، ئەو بەرپرسە ڕەتیکردەوە باس
لە سه‌رنجی سەردانەکە بکات.
دۆناڵد ترەمپ
به‌یانی ئه‌مڕۆ یه‌كشه‌ممه له هه‌ژماری تایبه‌تی خۆی له
Truth Social وه‌ك
په‌یامێك بۆ سه‌رۆك وه‌زیرانی ئیسرائیل نوسیویه‌تی، "ڕێکه‌وتن له غەززە بکە،
بارمتەکان وەربگرەوە!".
ترەمپ هه‌ینی
ڕابردو (27ی 6ی 2025) چاوەڕوانییەکانی بۆ ڕێککەوتنەکە بەرزکردەوە و ڕایگەیاند،
ڕەنگە لە ماوەی هەفتەی داهاتودا ڕێککەوتنی ئاگربەست ڕوبدات، پرسیاری ڕۆژنامەنوسانی
وەرگرت و وتی، "ئێمە کار لەسەر غەززە دەکەین و هەوڵدەدەین ئاگربه‌ست له
غەززە بکەین".
تره‌مپ چەندین
جار داوای کردوە ئیسرائیل و حەماس کۆتایی بە شەڕی غەززە بهێنن، سەرەڕای
ئاگربەستێکی هەشت هەفتەیی کە گەیشتە دەستبەکاربونی ترەمپ لە سەرەتای ئەمساڵدا،
بەڵام لەوکاتەوە هەوڵەکان بۆ گەیاندنی لایەنەکان بەرەو ڕێککەوتنێکی نوێ
شکستیهێناوه.
ڕاوێژکاری
باڵای نه‌ته‌نیاهۆ، ڕۆن دێرمر، وەزیری کاروباری ستراتیژی ئیسرائیل، بڕیار بو لەم
هەفتەیەدا گەشت بۆ واشنتن بکات بۆ گفتوگۆکردن لەسەر ئاگربەست.
نه‌ته‌نیاهۆ لە
ئێستادا لە پڕۆسەی دانوستاندایە بۆ ڕێککەوتنێک لەگەڵ بزوتنەوەی حەماس
تره‌مپ هه‌روه‌ها
باسی له‌وه‌كردوه، "نه‌ته‌نیاهۆ لە ئێستادا لە پڕۆسەی دانوستاندایە بۆ
ڕێککەوتنێک لەگەڵ بزوتنەوەی حەماس، کە بریتی دەبێت لە وەرگرتنەوەی بارمتەکان، چۆن
دەکرێت سەرۆک وەزیرانی ئیسرائیل ناچار بکرێت بە درێژایی ڕۆژ لەسەر هیچ شتێک لە
هۆڵی دادگادا دابنیشێت؟".
سوپای ئیسرائیل
ئه‌مڕۆ یەکشەممە فەرمانی چۆڵکردنی بەکۆمەڵی فەڵەستینییەکانی ناوچەیەکی بەرفراوانی
باکوری غەززەی دەرکرد، کە ئامانجێکی سەرەتایی شەڕەکە بو کە بەهۆی چەندین خولی
شەڕەوە زیانێکی زۆری بەرکەوتوە.
ئەڤیچای
ئەدرای، وتەبێژی سەربازی سوپای ئیسرائیل داوای كردوه چەندین گەڕەک لە ڕۆژهەڵات و
باکوری شاری غەززە و هەروەها کەمپی پەنابەرانی جەبەلی چۆڵ بكرێت.
ئه‌وه‌شی خسته‌ڕو،
"سوپا هێرشە پەرەسەندوەکانی خۆی بۆ بەشی باکوری شارەکە فراوانتر دەکات، داوای
ئەوە دەکات خەڵک بەرەو باشور بچنە ناوچەی موەسی لە باشوری غەززە".
ژمارەی خوێندراو : 411 جار