ڕەشنوسی ئەو ڕێككەوتنەی كە حكومەتی فیدراڵ بۆ واژۆكردن و دەربڕینی ڕەزامەندی لەسەری ئاراستەی حكومەتی هەرێمی كوردووە، لەلایەن هەریەكە لە محەمەد شیاع سودانی، سەرۆك وەزیران و حەیان عەبدولغەنی، وەزیری نەوت و فواد حسێن، وەزیری دەرەوە و سەرۆكی ئەنجومەنی باڵای ئابوری عێراقەوە ئامادەكراوە .
بەپێی ئەم ڕەشنوسە، لە كۆی 400 هەزار بەرمیل نەوتی رۆژانە، هەرێمی كوردستان رۆژانە 280 هەزار بەرمیل نەوت ڕادەستی كۆمپانیای سۆمۆ دەكات و، 120 هەزار بەرمیلیش بۆ كۆمپانیاكانی بەرهەمێهێنانی نەوت دەبێت و لەو ڕێگەیەوە ئەو قەرزە دەگەڕێننەوە كە كەوتووەتە لای حكومەتی هەرێم و تا ئێستا نەیداونەتەوە.
سەبارەت بە پێداویستی ناوخۆی هەرێم بۆ سوتەمەنی، ڕەشنوسی ڕێككەوتنەكە دەڵێت "بەغدا رۆژانە 42 هەزار بەرمیل نەوت تەرخاندەكات و سوتەمەنی بەو نرخە دەبێت كە لەسەرتاسەری عێراقدا هەیە" .
سەبارەت بە پرۆسەی "تەوتین"، بەغدا و هەولێر ڕێكدەكەون لەسەر دواخستنی بۆ ماوەی چوار مانگ، تا ئەوكاتەی ڕێكارەكانی گواستنەوە و كردنەوەی هەژماری بانكیی لەهەر سێ بانكی "ڕەشید و ڕافیدەین و TBI" تەواودەبن .
لەپاڵ ئەمانەشدا، هەرێمی كوردستان دەبێت مانگانە 50% ی داهاتی نانەوتی ڕادەستی وەزارەتی دارایی فیدراڵ بكات كە بڕەكەی لە 100 ملیار دینار كەمتر نەبێت .
بڕیاریشە حكومەتی كاربەڕێكەری هەرێم واژۆ لەسەر ڕەشنوسەكە بكات و لە كۆبوونەوەی ڕۆژی سێ شەممەی ئەنجومەنی وەزیرانی عێراقدا پەسەند بكرێت و بڕیاریش لە ناردنی موچەی مانگی پێنجی فەرمانبەران و موچەخۆرانی هەرێم بدرێت .
بەڵام ئەگەر حكومەتی كاربەڕێكەری هەرێم ڕەشنوسەكە ڕەتبكاتەوە، ئەوا ڕووبەڕوی دۆخێكی سەختتر لەوەی ئێستا دەبێتەوە بەتایبەت لە پرسی موچەی موچەخۆراندا 

ژمارەی خوێندراو : 9 جار