ڕوون میدیا
مالپەڕی "ئۆکسیۆس"ی ئەمریکی ئاشکرای کرد کە دۆناڵد تڕەمپ، سەرۆکی ئەمریکا، لە پەیوەندییەکی تەلەفۆنیدا داوای لە بنیامین نەتانیاهۆ، سەرۆک وەزیرانی ئیسرائیل کردووە هێزەکانی لە خاکی سووریا و لوبنان بکشێنێتەوە، بەهۆی ئەوەی مانەوەی هێزەکانی ئیسرائیل گرژییەکان زیاتر دەکات.
بەپێی ڕاپۆرتی مالپەڕەکە کە لە زاری بەرپرسانی ئەمریکی و ئیسرائیلییەوە گواستوویەتیەوە، تڕەمپ ڕۆژی پێنجشەممە لە پەیوەندییەکی تەلەفۆنیدا بە نەتانیاهۆی گوتووە:
"ئەوان نایانەوێت ئێوە لەوێ بن، پێویستە هێزەکانتان دووبارە بڵاوە پێ بکەنەوە."
تڕەمپ هەمان هەڵوێستی توندی بەرامبەر بە بوونی هێزەکانی ئیسرائیل لە لوبنانیش نیشانداوە. لە بەرامبەردا، نووسینگەی نەتانیاهۆ لە بەیاننامەیەکدا ڕایگەیاند کە سەرۆک وەزیران جەختی لەسەر "پێویستی دروستکردنی ناوچەی ئارام لەسەر سنوورەکانی ئیسرائیل" کردووەتەوە.
ئەم داواکارییەی تڕەمپ گوشارێکی توندی خستووەتە سەر نەتانیاهۆ، بەتایبەت کە تەنها سێ مانگی ماوە بۆ هەڵبژاردنە چارەنووسسازەکانی ئیسرائیل. چاودێران پێیان وایە دوورە نەتانیاهۆ لە ئێستادا هیچ هەنگاوێکی کرداری بۆ کشانەوە بنێت.
لە ئێستادا هێزەکانی ئیسرائیل لە ناوچەیەکی بەرفراوانی باشووری سووریا و باشووری لوبنان جێگیرن و حکومەتی ئیسرائیلیش دەڵێت ئەم بوونە سەربازییە بۆ ڕێگریکردنە لە دووبارەبوونەوەی هێرشەکانی هاوشێوەی 7ی ئۆکتۆبەر. لە کاتێکدا هەندێک بەرپرسی توندڕەوی ناو حکومەتی ئیسرائیل داوای مانەوەی هەمیشەیی و تەنانەت دروستکردنی نیشتەجێگا (مۆڵگەی جولەکەکان) لەو ناوچانەدا دەکەن.
ئەم پەیوەندییە تەلەفۆنییە دوای ڕۆژێک لە کۆبوونەوەی تڕەمپ لەگەڵ ئەحمەد شەرع، سەرۆکی سووریا لە پەراوێزی لووتکەی ناتۆ لە ئەنقەرە هات. ئۆکسیۆس ئاماژەی بەوە کردووە کە ئیدارەی تڕەمپ چەندین مانگە هەوڵی ڕێککەوتنێکی نوێی ئەمنی لە نێوان دیمەشق و تەلئەبیب دەدات، بەڵام گەیشتووەتە ئەو بڕوایەی کە نەتانیاهۆ ئامادە نییە سازش بکات.
سازشە داواکراوەکانی ئەمریکا بریتی بوون لە کشانەوەی قۆناغ بە قۆناغی سوپای ئیسرائیل لەو ناوچانەی سووریا کە دوای ڕووخانی ڕژێمەکەی بەشار ئەسەد لە کانوونی یەکەمی 2024دا کۆنترۆڵی کردبوون.
لە دۆسیەی لوبنانیشدا، نێوەندگیرانی ئەمریکی لە ڕۆما لەگەڵ دیپلۆماتکارانی ئیسرائیلی و لوبنانی کۆبوونەوە بۆ جێبەجێکردنی ڕێککەوتنێکی چوارچێوەیی کە چەند هەفتەیەک لەمەوبەر واژۆ کرابوو. بەپێی ڕێککەوتنەکە، دەبوو ئیسرائیل لە دوو ناوچەی ئەزموونی لە باشووری لوبنان بکشێتەوە، بەڵام تا ئێستا نەکشاوەتەوە. ئیسرائیل داوا دەکات سەرەتا دڵنیا بێتەوە لە نەبوونی چەک و ژێرخانی سەربازی حیزبوڵڵا لەو ناوچانە، لە کاتێکدا لایەنی لوبنانی داوای کردووە سوپای ئەمریکا ئەرکی ئەو پشکنینە بگرێتە ئەستۆ.
کۆشکی سپی ئامادە نەبوو بە فەرمی لێدوان لەسەر ڕاپۆرتەکەی ئۆکسیۆس بدات، بەڵام ناوەڕۆکەکەشی ڕەتنەکردەوە. بەرپرسێکی ئەمریکی بە مالپەڕەکەی ڕاگەیاندووە:
"تڕەمپ پەیوەندییەکی بەهێزی لەگەڵ نەتانیاهۆدا هەیە و هیچ دۆستێک بۆ ئیسرائیل و بەرگریکارێک بۆ ئاشتی لە تڕەمپ گەورەتر نەبووە."

ژمارەی خوێندراو : 49 جار