هاوکات لەگەڵ گەیشتنی تەرمی عەلی خامنەیی بۆ مزگەوتی گەورەی تاران لە نێو پێشوازییەکی بەرفراوانی فەرمی و جەماوەریدا، پرسیار و ناڕوونی لەسەر دەرکەوتنی مۆجتەبا خامنەیی، ڕێبەری نوێی ئێران لە مەراسیمەکەدا دروست بووە؛ ئەمەش بەهۆی مەترسییە ئەمنییە گەورەکان و ترسی تاران لە هێرشی نوێی ئەمریکا و ئیسرائیل.
هۆشیاری ئەمنی و گومانی پاراستنی "سەری سەرکردایەتی"
هەورە ڕەشەکانی نیگەرانی ئەمنی و هەواڵگری باڵیان کێشاوە بەسەر مەراسیمی بەخاکسپاردنی عەلی خامنەییدا، کە بڕیارە شەش ڕۆژ بخایەنێت. سەرچاوە ئەمنییەکان هێمایان بۆ ئەوە کردووە کە مۆجتەبا خامنەیی، ڕێبەری نوێ، بە توندی قەدەغەی دەرکەوتنی علوجی یان تەنانەت ناردنی پەیامی دەنگیشی لێکراوە، ئەمەش لە ترسی پرۆسەیەکی نوێی "بڕینی سەری سەرکردایەتی" (قطع رأس) کە لە لایەن واشنتن و تەلئەبیبەوە پێپەیڕەوی دەکرێت لەم دۆخی جەنگە بەردەوامەدا.
ئەم ڕێوشوێنانە دوای ئەوە دێن کە زانیاری دزەپێکراو ئاشکرایان کردووە کە ئیسرائیل پلانی هەبووە بۆ تیرۆرکردنی هەریەکە لە محەمەد باقر قالێباف، سەرۆکی پەرلەمان، و عەباس عێراقچی، وەزیری دەرەوەی ئێران لە کاتی خولەکانی دانوستاندندا.
شیکەرەوە سیاسییەکان و بەرپرسانی پێشووی ئەمریکا لەسەر پرسی دەرکەوتن یان نەدەرکەوتنی ڕێبەری نوێ بۆچوونی جیاوازیان هەیە:
حەسەن ئەحمەدیان (شیکەرەوەی ئێرانی): پێشبینی ناکات مۆجتەبا خامنەیی بە هیچ شێوەیەک دەربکەوێت، بەتایبەت دوای ئاشکرابوونی پلانە دزەپێکراوەکانی تیرۆرکردن.
جۆی هود (جێگری پێشووی وەزیری دەرەوەی ئەمریکا): دزەپێکردنی زانیارییەکان بە "نامەیەکی ئەمریکی" بۆ ئیسرائیل و ئێران دەزانێت؛ کە تێیدا واشنتن لە لایەک نەیاریی خۆی بە ئیسرائیل گەیاندووە و لە لایەکی دیکەشەوە ئێرانی ئاگادارکردووەتەوە تا خۆی بپارێزێت.
ئیبراهیم فەریحات (مامۆستای ناکۆکایەتییە نێودەوڵەتییەکان): پێیوایە ئەمریکا دەیەوێت لە ڕێی ئەم دزەپێکردنانەوە لەگەڵ ڕژێمی نوێی ئێران بێتە سەر هێڵ بۆ کۆتاییهێنان بە قەیرانەکە. هەروەها دەڵێت "سیاسەتی بڕینی سەرەکان" کاریگەرییەکی ئەوتۆی لەسەر سیستمە ئایدۆلۆژییەکان نییە، چونکە ئیسرائیل سەرکردەکانی حەماس و حزبوڵاشی کوشت بەڵام ئامانجەکانی نەپێکا، ئێستاش سوپای پاسداران کاروباری ئێران بەڕێوەدەبات.
سەرباری مەترسییە ئەمنییەکان، شاند و میوانانی زیاتر لە ٩٠ وڵات، لەنێویاندا شاندی باڵای وڵاتانی کەنداو، بەشدارییان لە مەراسیمەکەدا کردووە، ئەمەش بە بڕوای چاودێران نیشانەی توندوتۆڵی پێکهاتەی دەسەڵاتە لە تاران و ڕەتکردنەوەی ئەو بانگەشانەیە کە دەڵێن سیستمەکە لاواز بووە.
بەڵام لە هەمان کاتدا، ئەم قۆناغە وڵاتەکە دەخاتە بەردەم تاقیکردنەوەیەکی ڕاستەقینەی سەقامگیری، بەتایبەت لەگەڵ نزیکبوونەوەی وێستگە گۆڕانکارییە گەورەکانی وەک هەڵبژاردنی پەرلەمان و سەرۆکایەتی کۆمار لە ساڵی ٢٠٢٨دا.

ژمارەی خوێندراو : 560 جار