پارتی دیموکراتی کوردستان بە فەرمی پێشوازی لە دەستپێشخەرییەکەی مەسعود بارزانی دەکات بۆ ئاساییکردنەوەی ڕەوشی سیاسیی هەرێمی کوردستان و ئامادەیی خۆی بۆ بەستنی کۆبوونەوەی بەپەلە لەگەڵ یەکێتیی نیشتمانیی کوردستان و لایەنەکانی دیکە نیشان دەدات.
مەحموود محەممەد، گوتەبێژی پارتی دیموکراتی کوردستان، لە ڕاگەیێندراوێکدا ڕایگەیاند: "لەژێر ڕووناکیی دەستپێشخەرییەکەی جەنابی سەرۆک بارزانی، ئامادەین بۆ گفتوگۆ و کۆبوونەوە لەگەڵ برایانی یەکێتی بە مەبەستی چارەسەرکردنی کێشەکان و کۆتاییهێنان بە قەیرانی سیاسیی هەرێم." ئاماژەی بەوەش کرد کە ئامانجیانە لەگەڵ لایەنەکانی دیکەش دابنیشن تا پێکەوە وەڵامدەرەوەی ئیرادەی هاونیشتمانیان بن.
ئەم بەدەنگەوەهاتنەی پارتی دوای ئەوە هات کە بارەگای بارزانی لە راگەیێندراوێکدا داوای لە پارتی و یەکێتی کرد کۆببنەوە، کێشەکان چارەسەر بکەن و لەگەڵ لایەنەکانی دیکەش حکومەتێکی بنکەفراوانی نیشتمانی پێکبهێنن.
کۆبوونەوەی پەرلەمانی کوردستان لە ٤ی تشرینی دووەمی ۲۰۲٦ و هەڵبژاردنی دەستەی سەرۆکایەتی بە بەشداریی ٥٢ پەرلەمانتار، کاردانەوەی توندی یەکێتیی لێکەوتەوە؛ بەجۆرێک بافڵ تاڵەبانی، سەرۆکی یەکێتی، ڕەتکردنەوەی ئەنجامەکانی کۆبوونەوەکە و کشانەوەی حیزبەکەی لە حکومەت ڕاگەیاند، ئەمەش قەیرانێکی سیاسیی قووڵی لە هەرێمدا دروستکرد.
ژمارەی خوێندراو : 72 جار