شاخ پرێس:
ئەنجومەنی سیاسی یەكگرتووی ئیسلامیی كوردستان لە یادی كارەساتی (شەنگال) دا به‌یاننامه‌یه‌كی بڵاوكرده‌وه‌و رایده‌گه‌یه‌نێت جێگای داخە ئەمرۆ كە 6 مین ساڵیادی ئەو كارەساتەیە ، هێشتا ئاسەواری ئەوكاولكاریە بەسەر شەنگال وشەنگالیەكانەوە ماوە و برینە قوڵەكەیان هێشتا لە لایەن دەسەڵاتدارانی هەرێم و حكومەتی ناوەندەوە سارێژی وەكو پێویست نەكراوە.
ده‌قی به‌یاننامه‌كه :
بەیاننامەی ئەنجومەنی سیاسی یەكگرتووی ئیسلامیی كوردستان لە یادی كارەساتی (شەنگال) دا
لە ڕۆژێكی وەك ئەمڕۆدا دەستێكی دڕندە پەلاماری شاری شەنگالی ئازیزی داو لە ماوەیەكی كەمدا شاری شەنگال بوویە وێرانە و دانیشتوانە رەسەنەكەشی ئاوارە كران و بەشێكی زۆر لە ژن و منداڵ بوونە دیل و كۆیلە كران و دەنگدانەوەیەكی جیهانیی دروستكرد و وەك روداوێكی كۆمەڵكوژی و جینۆساید تۆماركرا.
بە داخەوە ئەو رووداوە دڵتەزێنە بەدەستی هێزێكی تیرۆریستی بەناو موسڵمان ئەنجامدرا و ئامانجی سرینەوەی گەلی كورد بە گشتی و ئێزیدیەكان بەتایبەتی بوو، كە هەمیشە ئامانجی سەرەكی نەیاران و دوژمنانی ئەم گەلە ڕەسەنە بووە.
جێگای داخە ئەمرۆ كە 6 مین ساڵیادی ئەو كارەساتەیە ، هێشتا ئاسەواری ئەوكاولكاریە بەسەر شەنگال وشەنگالیەكانەوە ماوە و برینە قوڵەكەیان هێشتا لە لایەن دەسەڵاتدارانی هەرێم و حكومەتی ناوەندەوە سارێژی وەكو پێویست نەكراوە، ئەمە ئەوە لە ئێمە دەخوازێت كە نێوماڵی خۆمان ڕێكخەین و رێگە لە درز و كەلێن و ناكۆكیە ناوخۆییەكان بگرین و پێكەوە رووبەرووی هەڕەشە و تەحەدیاتە دەرەكیەكان ببینەوە. وێرای زەرورەتی تۆخكردنەوەی گیانی پێكەوەژیان و یەكترقبوڵكردن و دژایەتی كولتووری خودپەرستی و یەكترسرینەوە.
ئومێد دەكەین پەند و وانە لەم جۆرە كارەساتانە وەرگرین و جارێكی تر هیوای ئومێد و دەستی بونیادنانەوە بگاتەوە ئەو شارە ستەمدیدەو سەرجەم شارو شارۆچكەكانی كوردستان.
ئەنجومەنی سیاسی و جەماوەری
ژمارەی خوێندراو : 256 جار