مه‌سعود پزیشكیان سەرۆككۆماری ئێران لە لێدوانێكدا بۆ ڕۆژنامەنوسان بەرەبەیانی ئەمڕۆ شەممە، دوای کۆبونەوەی لەگەڵ وەزیر و بریکاری وەزیرانی کاروباری دەرەوە وتی:
ـ  لەماوەی ئەو 12 ڕۆژەی بەرگری سەخت و بوێرانەی کە ئەنجامدرا، دوژمن بە هەمو توانای خۆی هەوڵیدا وڵات به‌چۆكدا بهێنێت و شکستی هێنا، لەم نێوەندەدا، شەرەفمەندان، خەڵکی وڵاتەکەمان ڕۆڵێکی دیاریان هەبو و بە بەرخۆدان و هاودەنگییەکی نمونەیی کارێکی گەورەیان ئەنجامدا کە شایەنی پێزانین و ڕێزگرتنە.
ـ دیپلۆماتكارانی وڵاتیش بە درێژایی کاتژمێره‌كانی شه‌و و ڕۆژ چالاک بون، وەک لە ڕێگەی ڕاگەیاندنەکانی ئێرانەوە دەبینرا، لە کاتێکدا هەندێک لە نوسینگەکان بەهۆی بارودۆخی شەڕەوە داخران، بەرپرسانی دیپلۆماسی وڵات لە شوێنی کارەکانیان ئامادە بون، پەیوەندییە نێودەوڵەتییەکانیان پاراست و لە ڕێگەی بەدواداچونی بەردەوامەوە دەنگی نەتەوەی ئێرانیان بە جیهان گەیاند
- دەرئەنجامی ئەو هەوڵانە ئەوە بو کە نزیکەی هەمو دامەزراوە نێودەوڵەتییەکان جگە لە ئەنجومەنی ئاسایش و نەتەوە یەکگرتوەکان ئەو دەستدرێژییەیان شەرمەزار کرد، ئەم دەستکەوتە گەورەیە بە ئاسانی بەدینەهات و دەرئەنجامی کارلێکە ئامانجدارەکان، هەوڵە بەردەوامەکان و دیپلۆماسیەتی چالاکانەی کۆماری ئیسلامی ئێرانە
- ڕژێمی زایۆنی شەڕێکی دەستپێکرد کە بەپێی هەمو پێوەر و یاسا نێودەوڵەتییەکان هەڵە و نایاسایی بو، بەڵام بەداخەوە لە جیهانی ئەمڕۆدا زۆرجار ئەم جۆرە کردەوە شەڕانگێزانە لەلایەن زلهێزەکانەوە ڕەوا دەبینرێت
- بەپێی ئامۆژگارییەکانی ڕێبەری باڵا، لە بارودۆخی ئێستادا، دو میحوەر دەبێت لە یەک کاتدا چالاک بن؛ یەکێکیان میحوەری بەرگری و ئەمنیی وڵات، کە هێزەکانمان دەبێت بە ئامادەیی و هێزێکی تەواوەوە بەرگری لە وڵات بکەن، ئەوی دیکەشیان میحوەری دیپلۆماسییە، کە دەبێت بە شێوەیەکی کاریگەر و چالاکانە مامەڵە بکات

ژمارەی خوێندراو : 52 جار