لە پرۆسەیەکی هەورەبروسکە ئاسا و ئاڵۆزدا، کە تەنها ٣٨ خولەکی خایاند، هێزە تایبەتەکانی ویلایەتە یەکگرتووەکانی ئەمریکا توانییان نیکۆلاس مادۆرۆ، سەرۆکی ڤەنزوێلا و هاوسەرەکەی دەستگیر بکەن و بیگوازنەوە بۆ نیویۆرک.
ئەمە وردەکاریی ئەو پلانە داڕێژراوەیە کە لە لایەن دەزگای هەواڵگری ناوەندی (CIA) و هێزە بژاردەکانی سوپای ئەمریکاوە جێبەجێ کرا.
١.داڕشتنی پلان و چاودێرییەکی چڕ
بەپێی زانیارییە سەرەتاییەکان، ئاژانسی CIA بۆ ماوەی دوو مانگ سەرقاڵی داڕشتنی پلانی دەستگیرکردنی مادۆرۆ بووە.
لە دوو هەفتەی کۆتاییدا، چاودێرییەکی وردی جووڵەکانی مادۆرۆ کراوە لە نێوان کۆشکەکان و حەشارگە جیاوازەکانیدا، تا ئەو کاتەی دەرفەتێکی زێڕین بۆ دەستگیرکردنی ڕەخساوە.
ئەرکی کۆتایی سپێردرا بە هێزی ناسراوی Delta Force بۆ کۆتاییهێنان بەم ئەرکە.
٢.جەنگی ئەلیکترۆنی و کوێرکردنی ڕادارەکان
سەرەتای کردە سەربازییەکە بە هێرشێکی چڕی جەنگی ئەلیکترۆنی دەستی پێکرد. فڕۆکە جەنگییەکانی جۆری EA-18G Growler لە کەناراوەکانی ڤەنزوێلا جێگیر بوون و دەستیان کرد بە پەکخستنی تەواوی سیستمە ئەلیکترۆنییەکان، کوێرکردنی ڕادارەکان و بڕینی پەیوەندییە سەربازییەکانی کاراکاس.
هاوکات، فڕۆکە جەنگییەکانی F/A-18 Super Hornet لەسەر کەشتیی فڕۆکەهەڵگری (جێراڵد فۆرد) و فڕۆکە پێشکەوتووەکانی F-35 کە لە پۆرتۆ ڕیکۆوە فڕیبوون، دەستیان کرد بە تێکشکاندنی سیستمەکانی بەرگریی ئاسمانی لە دەوروبەری پایتەخت لە ڕێگەی کردەی (SEAD/DEAD).
٣.ستراتیژی "شۆک و تۆقاندن"
دوای تێکشکاندنی بەرگرییە ئاسمانییەکان، ئەمریکا قۆناغی "شۆک و تۆقاندن" ی دەستپێکرد. چەندین بنکەی ستراتیژی لەوانە: بنکەی "لاکالاوتا"، قەڵای سەربازی "تیونا"، فڕۆکەخانەی "هیگیرۆتی" و بنکەی دەریایی "لا گایرا" بە خەستی بۆردومان کران. هەروەها تاوەرەکانی پەیوەندی و مەڵبەندەکانی سەرکردایەتی و کۆنترۆڵ کرانە ئامانج بۆ ئەوەی سوپای ڤەنزوێلا بە تەواوی پەکیبکەوێت.
٤.دابەزینی هێزە تایبەتەکان و دەستگیرکردنی مادۆرۆ
ئەم بۆردومانە چڕە ڕێگەی خۆشکرد بۆ هاتنەناوەوەی هێلیکۆپتەرەکانی جۆری MH-47 Chinook و Black Hawk و Little Bird، کە لە لایەن هێلیکۆپتەرە هێرشبەرەکانی AH-1Z Viperی هێزی دەریاییەوە دەپارێزران.
هێزەکانی سوپای ڤەنزوێلا و میلیشیا لایەنگرەکانی مادۆرۆ لە دەوروبەری شوێنی مانەوەی سەرۆک بۆردومان کران. پاشان هێزەکانی "دەلتا" لە ڕێگەی هێلیکۆپتەرەکانی فەوجی ئۆپەراسیۆنە تایبەتەکانەوە لە بنکەی "فۆرت تیونا" لە دڵی کاراکاس دابەزین. لەوێ توانرا نیکۆلاس مادۆرۆ و هاوسەرەکەی (سیسلیا فلۆریس) دەستگیر بکرێن و ڕاستەوخۆ بە ئاسماندا بەرەو نیویۆرک بگوازرێنەوە.
٥.ئەنجامی پرۆسەکە
سەرچاوە ئەمریکییەکان جەخت دەکەنەوە کە تەواوی پرۆسەکە تەنها ٣٠ بۆ ٣٨ خولەکی خایاندووە. هێزەکانی ئەمریکا توانیویانە بە بێ هیچ زیانێکی گیانی یان ماددی لەناو خاکی ڤەنزوێلا پاشەکشە بکەن، لە کاتێکدا مادۆرۆ ئێستا لەژێر دەسەڵاتی دادوەریی ئەمریکادایە لە نیویۆرک.
ژمارەی خوێندراو : 14 جار