لەگەڵ چوونە نێو ٦٧ەمین ڕۆژی هەڵگیرسانی شەڕی ئەمریکا و ئیسرائیل دژی ئێران، یەکەم ڕۆژی جێبەجێکردنی پڕۆسەکەی دۆناڵد ترەمپی سەرۆکی ئەمریکا کۆتایی هات کە ناوی لێنراوە «پڕۆژەی ئازادی».
سەرۆکی پەرلەمانی ئێران ڕایگەیاند کە ئەمریکا و هاوپەیمانەکانی، بە پێشێلکردنی ئاگربەست و گەمارۆدان، ئاسایشی کەشتیوانی و گواستنەوەی وزەیان خستووەتە مەترسییەوە. هەروەها وتیشی کە هاوکێشەیەکی نوێ لە گەرووی هورمز لە حاڵەتی دروستبووندایە و بەردەوامیی دۆخی ئێستا بۆ ویلایەتە یەکگرتووەکان جێگیر نابێت.
کەناڵی «سیبیئێس نیوز» لە زاری بەرپرسانی بەرگرییەوە بڵاویکردەوە کە دوو تێکشکێنەری ئەمریکی، دوای تێپەڕاندنی بەربەستێکی ئێرانی، بە گەرووی هورمزدا تێپەڕیون و چوونەتە نێو کەنداوەوە.
لەلایەکی دیکەوە، فەرماندەیی ناوەندیی ئەمریکا (سێنتکۆم) ڕایگەیاند کە دوێنێ دووشەممە دوو کەشتیی بازرگانی کە ئاڵای ئەمریکایان پێوە بووە، بە سەرکەوتوویی لە گەرووی هورمز تێپەڕیون؛ ئاماژەی بەوەش کرد کە سوپای پاسداران مووشەک و درۆنی ئاڕاستەی کەشتییە بازرگانییەکان کردووە و هێزەکانی ئەمریکا پاراستوویانن.
هاوکات، ئاژانسی «تەسنیم» لە زاری سەرچاوەیەکی سەربازییەوە بڵاویکردەوە کە ویلایەتە یەکگرتووەکان دوو بەلەمی سڤیلی کردووەتە ئامانج کە کەلوپەلیان پێ بووە، نەک بەلەمی خێرای سەر بە سوپای پاسداران.
ڕۆژنامەی «وۆڵ ستریت جۆرناڵ»یش لە زاری گوتەبێژی کۆشکی سپییەوە گواستییەوە کە سەرۆک ترەمپ هەموو بژاردەکان بە کراوەیی دەهێڵێتەوە لە کاتێکدا هەوڵی گەیشتن بە ڕێککەوتن لەگەڵ ئێران دەدات. هەروەها لە زاری بەرپرسانی ئەمریکی و ڕۆژئاواییەوە بڵاویکردەوە کە ئەگەر زۆرە ترەمپ لە ماوەی چەند ڕۆژێکی کەمدا ڕەزامەندی لەسەر وەڵامدانەوەی سەربازی دژی ئێران بدات.
پێشتریش ترەمپ ڕایگەیاندبوو کە ئەگەر ئێران هێرش بکاتە سەر ئەو کەشتییە ئەمریکییانەی «پڕۆژەی ئازادی» جێبەجێ دەکەن، ئەوا ئێران لەسەر ڕووی زەوی دەسڕێتەوە؛ ئاماژەی بەوەش کردبوو کە هێزەکانی ئەمریکا ٧ بەلەمی بچووکی ئێرانییان نوقم کردووە.
ژمارەی خوێندراو : 91 جار