گەلی سریلانكا راپەرین و سەرۆكی وڵات و
دارودەستەكەیان لە وڵات ڕاونا ، با بۆتان روون بكەینەوە ، بۆ چی بە جارێك هەزاران
گەنج و ژن و پیاوی رەشپێستی سریلانكا رژانە سەر شەقامەكان و خۆیان گەیاندە ماڵی
سەرۆك و سەرۆكیان شاربەدەر كرد؟
بەراست وەزعی سریلانكا لە هەرێمی كوردستان
وێرانترە ؟
با روونی بكەینەوە.
سریلانكا لە ساڵی 1977وە خاوەنی پەرلەمانن و
شەڕی ناوخۆی ئەو وڵاتە لە ساڵی 2009 كۆتایی پێهاتووە و بنەماڵەی راجاپاکسا
دەستیان بەسەر حكومڕانی ئەو وڵاتەدا گرتبوو.
لە هەرێمی كوردستان ساڵی 1992 پەرلەمان
دامەزراو و ساڵی 2003 شەڕی ناوخۆ بە رەسمی كۆتای پێهاتووە و دوو بنەماڵە دەستیان
بەسەر هەموو شتێكی ئەم هەرێمەدا گرتووە و
هەموو رۆژێكیش زەنگی شەڕی ناوخۆ لێدەدەن و سنوری دێگەڵە تۆخ دەكەنەوە .
لە سریلانكا سەرۆكی وڵات تەنها دوای
تێپەربوونی دوو ساڵو نیو لە تەمەنی پەرلەمان ، دەتوانێت پەرلەمان هەڵبوەشێنێتەوە
بەڵام لە هەرێمی كوردستان حزبێك دەتوانێت هەركات دڵی خواستی پەرلەمان دابخات و
سەرۆكەكەی بۆ ئەودیوی سنوری حزبەكەی بنێرێتەوە
راجاپاکسا یەكەم سەرۆكی سریلانكا
بوو كە كەسێكی سەربازی و هەواڵگری بێت.
لە هەرێمی كوردستانیش سەرۆك وەزیرانی ئیستا
مەسرور بارزانی یەكەم سەرۆكە كە لە دەزگای هەواڵگریەوە هاتووە و بووەتە سەرۆك
وەزیران.
رێژەی دانیشتوانی سریلانكا 21 ملیۆن كەسە و
قەرزەكانی حكومەتەكەیان 34 ملیارو 659 ملیۆن دۆلارە
ریژەی دانیشتوانی هەرێمی كوردستان 6 ملیۆن
كەس و قەرزەكانی حكومەتی هەرێمیش 31 ملیار 637 ملیۆن دۆلار.
خاكی سریلانكا خاكێكی بە پیتە بۆ كشتوكاڵ و دووەم بەرزترین
داهاتی سەرتاسەری هەیە لە باشووری ئاسیادا هەیە.
هەرێمی كوردستانیش خاوەنی زەویەكی بە پیتی كشتوكاڵییە وجگە لە نەوتەكەی
خاوەنی حەوتەمین یەدكی غازی جیهانە.
سریلانكا لە ساڵی 2019وە قەیرانەكان
دەستیان پێكرد بەڵام هەریمی كوردستان لە 2014وە قەیران لەسەر قەیران زیاتر دەبێت.
هەردوو وڵاتی خەڵكەكەی گیرۆدەی یەك شتن سەرەگرتن (وەرگرتنی موچە و بەنزین
ونەوتی سپی و غازی ماڵان و گرانی شتومەك ـ) هەردوولاش وڵاتیان وێرانە بە دەستی
نەبوونی خزمەتگوزارییە سەرتاییەكان و خراپی رێگەوبانەكان و ئاوی پاكەوە.
هەردوو وڵات بەرپرسەكانیان پڕن و لە كۆشك و بەرزاییەكان دەژین و خەلكەكەشیان
هەژار و شەو لە سەری وەرگرتنی و جێبەجێكردنی پێداویستیەكانیان رۆژ دەكەنەوە.
بەڵام جیاوازی ئەم دوو وڵاتە تەنها لە خەلكەكەیدایە " خەلكی هەرێمی
كوردستان سنگ فراوانن و سەبریان زۆرە و نیشستیمان پەروەرن و 9 ساڵە بەرگەی قەیران
دەگرن بەڵام گەلی سریلانكا نەیانتوانی 3 ساڵ بەرگەی قەیرانەكان بگرن.
ئەوەی روونە گەلی سریلانكا بریاری خۆی دا وهەڵیانكۆتایە سەر ماڵی سەرۆكی
وڵات و شاربەدەریان كرد
ئەوەی ناروونە چارەنوسی خەڵكی هەرێمی كوردستان هێشتا بریاری خۆی نەداوە و
چاوەرێ رەحمی سەرۆكی وڵات دەكەن.
ژمارەی خوێندراو : 119 جار