هەمووان پەلەیانە بۆ پێكهێنانی حكومەتی نوێ ، جگە لە موقتەدا سەدرنەبێت ، چونكە هەلی زێڕینی خۆی لە دەستدا و نەیتوانی یارییەكە لە چوارچێوەی هەماهەنگی بباتەوە.

ئەمریكا ، سعودیە وئیمارات لە لایەكەوە و لە لاكەی دیكەشەوە ئێران پەلەیەتی بۆ ئەوەی هەرچی زووە حكومەتی نوێ عێراق پێكبهێنرێت بەڵام هەر لایەكیان خواستێكی جیاوازیان هەیە .

ئێستا تۆپەكە لە ساحەی چوارچێوەی هەماهەنگی و دەیەوێت ئەم هەفتەیە حكومەتی نوێ عێراق پێكبهێنێت.
موستەفا كازمیش بە تەوقە گەرمەكانی لەگەڵ جۆبایدەن لە سعودیە و بە دیهێنانی خواستەكانی ئەمریكا بۆ رێككەوتنەكانی وزەی عێراق لەگەڵ وڵاتانی كەنداو خوێنی خۆی لای چوارچێوەی هەماهەنگ تاڵ كردووە رەنگە تەمەنی درێژ لە پۆستی سەرۆك وەزیراندا تا كۆتایی ئەم هەفتەیە بێت.
چوارچیوەی هەماهەنگی لە نێوان خۆیاندا پۆستی سەرۆك وەزیرانیان یەكلایی كردوەتەوە و  كاندیدە بەهیزەكانیش بۆ ئەو پۆستە نوری مالیكی و حەیدەرعەبادی و محمد شیاع سودانین.

 ئەوەی ماوەتەوە یەكلایی كردنەوە كاندیدێكە بۆ پۆستی سەرۆككۆمار، كە دەبێت یەكیتی وپارتی لەسەری رێكبكەون گەرنا پێدەچێت چوارچیوەی هەماهەنگی بەسەركەوتنی بەرهەم ساڵح كاندیدی یەكیتی نیشتیمانی ئەو پۆستە یەكلایی بكاتەوە.

سەردانەكەی جۆ بایدەن بۆ سعودیە ، سەركەوتنی چوارچێوەی هەماهەنگی سەختتر كردووە چونكە ئەمریكا دەیەوێت عێراق بخاتە ناو چنگی سعودیە وئیمارات كە رۆژ بە رۆژ ئەوانیش دۆستایەتیان لەگەڵ ئیسرائیل گەرمتر دەبێت و ئەوەش لای شیعەكانی عێراق و خودی ئێرانیش هێڵی سوورە و ڕیگەپێدراو نیە.

هەرچی توركیای دراوسێیە ئەوەی بە لایەوە گرنگە پاراستنی بەرژەوەندییەكانیەتی كە بۆری نەوت و گازی هەرێمی كوردستانە وبریارەكانی دادگای باڵای فیدڕاڵی و فشارەكانی وەزارەتی نەوتی عێراقیش تەنگیان پیهەڵچنیوە .


ململانێ لایەنە سیاسی و دژبەیەكەكان لە ناوخۆی عێراقدا رەنگە گەشتبێتە خاڵی كۆتایی و نزێك بە لە دایكبوونی حكومەتیكی نوێ بەڵام خواستەكانی ئەمریكا بۆ پێشكەش كردنی عێراق بە وڵاتانی كەنداو و سڕینەوەی ئێران لە عێراقدا رەنگە هێنانەدی ئەو پێشبینیانە بێت كە عێراق هەرگیز رۆژێكی ئارام بە خۆیەوە نابینێت عێراقیش ببێتە سوریا و یەمەنێكی دیكە لە ناوچەكەدا.

ژمارەی خوێندراو : 123 جار