ئەم كچە تەمەن 52 ساڵە بە ونەوەشەیەكی شیكەوە
، جڕت وفڕتی نێوان هەڵەبجە و خوڕماڵ دەكات
و لاف و گەزاف بەوەی لێدەدات كە پلەی حزبی لە ناو پارتی دیموكراتی كوردستاندا هەیە
وكەسێكی ناسراوە .
هەربەو هۆیەشەوە توانیویەتی لە هەڵەبجە و خورماڵ
و شارەزور قۆڵی كۆمەڵێك دوكانداری موبایل فرۆش و ئاڵتون فرۆش ببڕێت و بایی 500
هەزار دۆلار شتیان لێ ببات و دیار نەمێنێت.
موبایل و ئاڵتون و ئەشیای كارەبایی بە قیست
بردووە بەڵام دوای دانەوەی چەند قیستێك ئیدی ون دەبێت.
لە دوكانیكدا 88 موبایلی ئایفۆنی 13 پرۆماكسی
بردووە و لە دوكانێكی تردا 31 مۆبایلی 12 پرۆماكس ، لە دوو دوكانی ئاڵتونیش وەك
ئەوەی باس دەكرێت بایی نزیكەی 8 دەفتەر
ئاڵتونی بردووە .
لە ماوەی 5 مانگدا ئەم هەموو پارەیە كۆ
كردوەتەوە خۆی ون كردووە و كەسیش نازانێت ئەم ئاڵتون و موبایلانەی بۆ كوێ وبۆ چی بردووە ؟
دووكاندارەكان دەڵێن لەبەر ئەوەی ئەم ئافرەتە
كەسێكی دیار و ناسراوی ناو پارتی بوو لە ناوچەكەدا و بەرپرسیاریەتی هەبووە ، بۆیە
بە قەرز وقیست ئەم هەموو موبایلانەمان پێداوە كە چی ئێستا بەرپرسانی پارتی لە
هەڵەبجە و هەورامان هیچ جۆرە بەرپرسیارییەتیەك وەرناگرن .
دەوترێت ئەم ئافرەتەش پەیوەندیەكی تۆكمەی
لەگەڵ بارەگای بارزانی هەبووە و چەندجاریكیش هاوكاری ماددی بۆ قوتابخانەكانی
خورماڵ هێناوە.
ئێستا نزیك بە 10 دوكاندار چاوەڕی دەركەوتنی
ئەم كچە دەكەن بەڵام تەنها چەند كەسێكیان سكاڵایان لەسەر تۆمار كردووە چونكە ئەوانیتر
لەسەر متمانە شتیان پێداوە و بەڵگەی یاسایان نیە.
پولیسی هەڵەبجەش دەڵێت ئەوە قەرز و قیستە لە
دەرەوەی دادگا و یاسادا دراوەتە ئەو كچە هەربۆیە ئە وان ناتوانن تەداخول بكەن.
هەرچەندە خەلكی ناوچەكە و زۆرینەی خاوەن
قەرزەكان پێیان وایە ئەم كچە بۆ دەرەوەی وڵات هەڵهاتووە بەڵام خاوەن قەرزێكیان بۆ
روون میدیا دەڵێت لە هەولێرەو لە پەنای حزبەكەیدا خۆی حەشارداوە و دەیەوێت سوڵحی
عەشایری بۆ بكرێت و ئەوان لە بەشیكی قەرزەكان خۆش بن ئەوكات بگەڕێتەوە بۆ ناوچەكە.
ئەم جۆرە فڕت وفێڵ و قۆڵبڕینەی ئەم كچە
ئەنجامی داوە رێك وپێك لە فڕت وفێڵەكانی سڵێمان هەڵشۆی و هاوشێوەكانیەتی لە
دەربەندیخان و سلێمانی وهەولێر دەچێت.
ئەوەی روونە كچێكی تەمەن 52 ساڵ 500 هەزار
دۆلاری هاوڵاتیانی بردووە و خۆی ونكردووە ئەوەشی ناروونە كەسێكی دیاری حزبی ئەم
هەموو موبایلانەی بۆ چی بووە و لەكوێ ساغیان دەكاتەوە ؟
ژمارەی خوێندراو : 214 جار