پارتی دیموكراتی كوردستان لە وەرگرتنی پۆستی سەرۆك كۆماری بێ هیوا بووە و دەیەوێت یەكیتی رازی بكاتەوە كە هەڵبژاردنی پەرلەمانی كوردستان یەك بازنە بێت.
شەش مانگ ململانێ و گۆڕینی كاندید بۆ وەرگرتنی پۆستی سەرۆك كۆمار لەگەڵ یەكیتی نیشتیمانی ، ئێستا بێ هیوایی تەواو ڕووی لە پارتی كردووە و بە پێی زانیارییەكانی روون میدیا ، مەسعود بارزانی راستەوخۆ بە باڤڵ تاڵەبانی وتووە كە رازی نابن هەڵبژاردنی پەرلەمانی كوردستان بكرێتە فرە بازنەیی و دەست بۆ كورسی كەمینەكان ببرێت.
پارتی دەیەوێت مامەڵەیەك لەگەڵ یەكیتی بكات و بە منەتەوە رێبەر ئەحمەد بۆ پۆستی سەرۆك كۆماری عێراق بكشێنێتەوە بەڵام لە بەرامبەردا دەبێت یەكیتی نیشتیمانی بە داواكارییەكانی پارتی بۆ هەڵبژاردنی پەرلەمانی كوردستان رازی ببێت.
یەكیتی نیشتیمانی و كۆمەڵی دادگەری و یەكگرتووی ئیسلامی بە ڕوونی ڕایانگەیاندووە كە دەبێت هەڵبژاردنی پەرلەمانی كوردستان فرە بازنەیی بێت , ئەوەش پارتی نیگەران كردووە.
ئەم هاوڕاییەی حزبەكان جگە لە پارتی وەك رێككەوتنە چوار قوڵیەكە یەكیتی وگۆران و كۆمەڵ یەكگرتوو دێتە پێش چاو بۆ هەمواری یاسایی سەرۆكایەتی هەرێم و لادان مەسعود بارزانی لە پۆستی سەرۆك هەرێم و دابەش كردنی دەسەڵاتەكانی.
بە پێی بەدواداچوونەكانی روون میدیا پارتی دیموكراتی كوردستان بۆ هەڵبژاردنەكانی هەرێم پشت بە ناوچەكانی مێرگەسۆر و بادینان دەبەستێت و لەوێشەوە دەنگ بۆ كاندیدەكانی لە سلێمانی و ناوچەكانی تر كۆدەكاتەوە گەرنا بە دەستهێنانی 43 كورسی بۆ حزبێك كە 30 ساڵە حكومرانیەكی پڕ قەیران وكیشە پێشكەشی خەڵك دەكات بەدەستهێنانی 20 كورسیش مەحاڵە .
سەرەڕای هەموو ئەو فڕت وفێڵ و تەزویراتانەی لە هەڵبژاردنەكاندا دەكرێت پارتی هێشتا زۆرینەی پەرلەمان نیە بەلام بە پشت بەستن بە كورسی كەمینەكان بووەتە زۆرینە كە ئەوەش نیگەرانی لایەنە سیاسیەكانی دیكەی لێكوەتەوەوتەوە وەك هاوڕایی و رێككەتنێكی سیاسی پێكەوە نایانەوێت چیدیكە كورسی كەمینەكان لە ژێر كۆنترۆڵی پارتی و بە دەست پارتیەوە بێت و پارتی لە دەڤەری مێرگەسۆر وبادینانەوە بە خواستی خۆی سندوقی دەنگدان پڕبكاتەوە لە هەرشوێنێك هەر كاندیدێكی بوێت دەریچێنێت.
هەر چەندە پارتی سوور بوو لەسەر وەرگرتنی پۆستی سەرۆك كۆمار و لەگەڵ یەكیتی هاوبەشی 30 ساڵەیدا گەیاندبوویانە مریشكە رەشە و راگەیاندنەكانیان بە خەیاڵی شەری ناوخۆوە و هەزارو یەك مەلەفی گەندەڵی و دزی وخیانەتی یەكتریان هەڵدایەوە بەڵام ئێستا پارتی سەرۆك كۆماری لە دەستچووە و نایەوێت هەرێمی كوردستانیشی لە دەستبچێت و دەویوێت بگەڕێتەوە بۆ دانوستان و گفتوگۆ لەگەڵ یەكیتی دا.
لە هەمواری یاسای سەرۆكایەتی هەرێم و لە دابەش كردنی دەسەڵاتەكانی سەرۆكی هەرێمدا یەكیتی نەیتوانی بەرامبەر پارتی , لە پشت لایەنەكانی دیكەوە بوەستێت ، هەرزوو بە رێككەوتنێكی ژێربەژێر لە گەڵ پارتی لە پێناو ریفراندۆم پەرلەمانی كوردستانیان كارا كردەوەو پشتی هاوپەیمانیە سیاسیەكانی بەردا.
ئەوەی روونە ئێستا پارتی سەرۆك كۆماری لەدەستچووە و دەیەوێت لە بەرامبەردا یەكیتی بە خواستەكانی بۆ هەڵبژاردنی پەرلەمانی كوردستان رازی بكات.
ئەوە ناروونە ، ئاخۆ یەكیتی نیشتیمانی جارێكیتر پشتی هاوپەیمانیە سیاسیەكانیان لەسەر هەمواری یاسایی هەڵبژاردن چۆڵا دەكات و دەچێتەوە ژێر پەروباڵی پارتی .
ژمارەی خوێندراو : 156 جار