شاخ پرێس:
میدیاکانی تورکیای نزیک لە حکومەت، زانیاری نوێ لەبارەی ڕوداوی کوشتنی جێگری کونسوڵخانەی تورکیا لە ھەولێر بڵاودەکەنەوە و بەپێی ئەو زانیارییانە ئەو کەسانەی ئەو ھێرشەیان ئەنجامداوە ژمارەیان سێ کەس بووە .
میدیاکانی تورکیا دەڵێن "دوای سەیرکردنەوەی کامێراکانی ڕێستورانتەکە و ئەوانەی نزیک لەو شوێنە دەرکەوتووە، تەقەکەرەکان ژمارەیان سێ کەس بووە و پێشتر چاودێری شوێنەکەیان کردووە و ئۆتۆمبێلێکی بچوکیشیان پێ بووە و ھەندێک سەرچاوە دەڵێن ئۆتۆمبیلەکە لە جۆری تۆیۆتا یارس بووە" .
ئەو سەرچاوانە باسلەوەشدەکەن "دوان لەو سێ کەسە چونەتە ژوورەوە بۆ ڕێستورانتەکە و یەکێکیشیان لەناو ئۆتۆمبیلەکە چاوەڕێی کردوون و، لەپاش چوونە ژوورەوەی ئەو دوو چەکدارە، لە دیبلۆماتکارە تورکیەکە نزیکبوونەتەوە و دەستبەجێ تەقەیان لێکردووە و ھەر لەوێدا گیانیلەدەستداوە" .
میدیای تورکیا ئاشکراشیکردووە کە ھێرشەکە بەدەمانچەی بێدەنگ ئەنجامدراوە و یەکێک لە ھێرشبەرەکانیش لەلایەن پاسەوانێکی رێستورانتەکەوە لەکاتی ھەڵاتنیاندا تەقەی لێدەکرێت و بە برینداری ھەڵدێت .
دیبلۆماتکارە تورکیەکە ناوی (عوسمان کۆسێ) بووە و تەمەنی (٣٦) ساڵە و پلەی جێگری کونسوڵی تورکیایە لە شاری ھەولێر .
ھاوکات ھەر لەو ڕووداوەدا دوو ھاونیشتمانی دیکەی ھەرێمی کوردستانیش کە خەڵکی شاری سۆرانن کوژران کە یەکێکیان ناوی (نەریمان عوسمان) ە و و خزم و پاسەوانی ئازاد جوندیانی ڕاوێژکاری ئێستای مەسعود بارزانی و ئەندامی پێشووی مەکتەبی سیاسیی یەکێتی نیشتمانی کوردستانە و، ئەوی دیکەش ناوی (بەشدار ڕەمەزان) .
ژمارەی خوێندراو : 467 جار