بۆ چی توركیا كراوەتە ئامانج ؟ خۆ ئەمە یەكەمجار نیە توركیا گەشتیاری عەرەب لە ناو خاكی عێراقدا دەكوژێت؟
توركیا لە هێزی ناتۆدا باڵادەستە و ورد و دەقیقە لە پێكان ، لە دەشتی گەرمیان و لە ناو گەرەكەكانی سلێمانیشدا ئامانجی خۆی بێ هەڵە پێكاوە .
ئێستا بە كوژرانی 9 گەشتیاری عەرەب ، هەموو لایەك بە بەرپرسانی باڵای پارتی و عێراقەوە هاتونەتە سەرخەت و بە ناوی بەرگری لە خاك و خەڵكی سڤیل ، دژی توركیا وەستاونەتەوە و شەقامیان خرۆشاندووە و توركیاش دەڵێت ئەو نەبووە.
ئەمە یەكەمجار نیە خەڵكی سڤیل و تەنانەت گەشتیاری عەرەب بە تۆپ و بومبارانی توركیا دەكوژرێت.
ساڵی رابردوو دوو گەشتیاری عەرەب لە هەمان شوێن بە دەستی توركیا كوژران كەچی هیچ كەس دەنگی لێ بەرز نەبوویەوە.
ئەوەی ئێستا لە عێراق روودەدات دەرخەری ئەوەیە توركیا لە سەر سوریا وئۆكراینا و عێراق لەگەل روسیا و ئێران لە كۆبوونەوەی لوتكەی سێ قوڵی تاران نەگەشتونەتە رێككەوتن و توركیا مل نادات و دەیەوێت لەشكەركێشیەكانی بۆ سەر خاكی سوریا درێژە پێبدات و بە ناوی ناتۆوە بەردەوامبێت لە پشتیوانیەكانی بۆ ئۆكراینا و لە عێراقیش بە ناوی ڕاماڵینی پەكەكە و تیرۆریستەوە خەریكە پەل بۆ بەغدا دەهاوێژێت.
لە عێراق چی دەگوزەرێت ؟
توركیا لە سەر خاكی عێراقدا بە تەنیا ماوەتەوە ، ئەمریكا و روسیا و ئێران و تەنانەت وڵاتانی كەنداو دژی سیاسەتەكانی توركیان یان بێدەنگ و تەماشاكارن .
پارتی دیموكراتی كوردستان ولایەنە سیاسیەكانی ناوخۆی عێراقیش دژی توركیا هەڵویست دەردەبڕن.
چاودێرانی سیاسی دەڵێن كوشتنی ئەو گەشتیارانە هەڵەیەكی هەواڵگریانە بووە و توركیا خراوەتە ناو تەڵەیەكەوە بۆ ئەوەی شەقامی عێراقی وتەنانەت ئەنجومەنی ئاسایشی نێودەوڵەتی لە دژی بێنە جواب.
ئەوەی روونە توركیا خراوەتە ژێرفشارێكی قورسی زلهێزەكانەوە ، رەنگە تاكە رێگەی دەربازبوونی ملدان بێت بۆ خواستەكانی ئێڕان و روسیا كە ئەمریكاش لاوازی توركیای لا مەبەستە.
ئەوەشی ناروونە ئاخۆ دژایەتی هاوبەشی عێراقیەكان بۆ توركیا نێو ماڵی عێراق رێكدەخاتەوە.
ژمارەی خوێندراو : 150 جار