ئەمڕۆ کوڕانی جەلال تاڵەبانی لە یەکەم بەڵێنی بانگەشەی هەڵبژاردنی پەرلەمانی کوردستان پاشگەزبوونەوە و ناڕاستەوخۆ پشتیوانی خۆیان بۆ پرۆژەی هەژماری من راگەیاند.
لە دوایین هەڵوێستی قوباد تاڵەبانی جێگری سەرۆکی حکوومەت و کوڕە بچووکی جەلال تاڵەبانی کە هاوڕێ لەگەڵ بافڵ تاڵەبانی برا گەورەی ئیدارەی یەکێتی نیشتیمانی دەدەن ناڕاستەوخۆ پشتیوانی لە پڕۆژەی هەژماری من کرد.
لە گەرمەی بانگەشەی هەڵبژاردنەکانی پەرلەمانی کوردستان بافڵ تاڵەبانی سەرۆکی یەکێتی بەردەوام جەختی لەوە دەکردەوە کە پرۆژەی هەژماری منی حکوومەتی هەرێم رەت دەکەنەوە و ئامادەنین پێوەی پابەند بن.
بافڵ تاڵەبانی لە کۆبوونەوە جەماوەرییەکانیدا پرۆژەکەی بە ناوی پرۆژەی مەسرور بانگ دەکرد و دەیوت لای ئەوان کۆتایی پێ هاتووە.
ئەمڕۆ پێچەوانەی لێدوانەکەی سەردەمی بانگەشەی هەڵبژاردنەکان، قوباد تاڵەبانی بە گرژییەوە وەڵامی پرسیاری رۆژنامەنووسێکی لەسەر پرۆژەکە دایەوە و تو خوا واز لە مەوزوعی تەوتین بهێنن،وەڵا مێشكی ئەو میللەتەتان تێكدا.
جیا لەو بافڵ تاڵەبانی سەرۆكی یەكێتی لە كۆنگرەی دیالۆگی نێودەوڵەتیی بەغداد کە ئەمڕۆ بەڕێوەچوو لەبارەی پڕۆژەی هەژماری منەوە جیاواز قسەی کرد و وتی لەکۆبوونەویە لەگەڵ مەسرور بارزانی باسی لە پڕۆژەکە کردووە.
وەک نیشاندانی رەزامەندی لەسەر پرۆژەکە وتی هەندێك بابەتی هونەریی لەبارەوە هەبوون كە راستییەكەی ئەو لێی ئاگادارنەبووە.
ئەم هەڵوێستە نوێیەی یەکێتی دوای نزیککەوتنەوەیەتی لەگەڵ پارتی لەسەر پێکهێنانی کابینەی نوێی حکوومەتی هەرێم و دابەشکردنی پۆستەکان.
رەتکردنەوەی پرۆژەی هەژماری من لە سنووری یەکێتی لە سەرەتای دەستپێکردنی ناکۆکییەکانی ئەو دوو حیزبەوە دەستی پێکرد و لە بانگەشەی هەڵبژاردنەکاندا گەیشتە لوتکە، کاتێک نوسینگەکانی پرۆژەکە لە سلێمانی داخران و نوسراو بۆ دەستپێکردنی تەوتین لە سلێمانیەوە ئاڕاستەی بەغدا کرا.
ئێستا دوای چەند مانگێک تێپەڕبوون بەسەر بەڵێنەکانی بافڵ تاڵەبانی، یەکەم بەڵێنی جێبەجێ نەکرد و پرۆژەی هەژماری منی لەبری تەوتینی بانکە فیدڕاڵییەکانی عێراق هەڵبژارد.
مامۆستایان و فەرمانبەران یەکێک لەداواکارییە سەرەکییەکانیان تەوتین کردنیانە لە بانکە فیدڕاڵییەکانی عێراق بە ئامانجی ئەوەی مووچە لە دەست حکوومەتی هەرێم دەربهێنرێت و راستەوخۆ لەلایەن بەغداوە دابەش بکرێت.
ئەمڕۆش بۆ جێبەجێ کردنی ئەو داواکارییە و داواکارییەکانی دیکەیان، رێگای هاتوچۆی تانکەرە نەوتە قاچاغەکانیان لە نزیک ناحیەی عەربەت داخست.
مامۆستایان بەم هەنگاوەیان دەیانەوێت سەرچاوەی داهاتی پارتی و یەکێتی پەک بخەن کە لە رێگەی فرۆشتنی نەوت بە قاچاخەوە مانگانە نزیک بە ٢٠٠ ملیۆن دۆلاریان دەست دەکەوێت.
ڕێبوار حەمەلاو ئەحمەد