دوو رۆژە رێبەر ئەحمەد وەزیری ناوخۆی حکوومەتی ماوە بەسەرچووی هەرێم بۆ بەشداری لە کۆڕبەندێک لە بەریتانیایە، میدیاکانی پارتی بە گرنگی و بە شانازییەوە بەشداریکردنی نیشان دەدەن! بەڵام لە بنەڕەتدا بەهۆی خراپی حکومڕانیی پارتی و یەکێتیەوە بەشداری پێ کراوە!
خراپی گوزەرانی هاووڵاتیان، ناعەدالەتی کۆمەلایەتی، گەندەڵی ئیداری و فەسادی دارایی لەو هۆکارانەن کە شەپۆلی بەردەوامی کۆچی گەنجانی کوردستان بەرەو ئەورووپا بەردەوامی پێ بدات، ئەوەش وایکردووە حکوومەتی بەریتانیا بهێنێتە سەر خەت.
کۆڕبەندەکە تایبەتە بە پاراستنی ئاسایشی سنوورەکان کە ئامانجی سەرەکی لێی رێگری کردنە لە کۆچی نایاسایی.
هەرچەندە ئامارێکی ورد لەبەردەستدا نیە کە ساڵانە چەند لە هەرێمی کوردستانەوە خۆیان دەگەیننە ئەو وڵاتە بەڵام بەرزی رێژەی کوردەکانی باشوور وایکردووە لە ماوەی چەند مانگێکدا چەندجارێک بەرپرسانی باڵای بەریتانیا بگەنە هەرێم و داوای رێگری لە قاچاخی کۆچبەرانیان بکەن.
لە ماوەی رابردوو حکوومەتی بەریتانیا بەهاوکاری دەزگا ئەمنییەکانی هەرێم لە سلێمانی دوو گرووپی بازرگانی کردن بە مرۆڤیان دەستگیرکردووە کە کۆچبەرانی هەرێمیان بۆ بەریتانیا و وڵاتانی دیکەی ئەورووپا گواستوەتەوە.
بەرپرسانی بەریتانیا ئەوەیان بۆ روون بووەتەوە کە هەرێمی کوردستان بووەتە ناوچەیەکی گرنگ بۆ گەشەکردنی قاچاخچێیەکان کۆچکردن، تەنانەت بەشێکی بەرچاوی ئێرانی و سورییەکانیش لە رێگەی قاچاخچیەکانی هەرێمەوە خۆیان دەگەیننە ئەو وڵاتە.
ئەمە وایکردووە، ناچاربن وەزیری ناوخۆی حکوومەتی ماوە بەسەرچووی هەرێم هاوشان لەگەڵ وەزیری ناوخۆی وڵاتانی جیهان بەشداری لە کۆنفڕانسی پاراستنی ئاسیشی سنوورەکان پێ بکەن.
میدیاکانی پارتی بەشداریکردنی رێبەر ئەحمەد لەو کۆڕبەندە، بە شانازییەوە باس دەکەن، چونکە لە پاڵ دەیان وەزیری وڵاتانی سەربەخۆدا بەشداری پێکراوە، دەیانەوێت وا نیشانی بدەن کە ئەمە حسابکردنە بۆ هەرێمی کوردستان! بەڵام لە راستیدا بابەتەکە تەنیا رێگری کردنە لە هەڵهاتنی خەڵک لە دەست حکوومەت و دەسەڵاتەکەی پارتی و یەکێتی و هیچی دیکە!.
هەرێمی کوردستانی عێراق لەگەڵ ئەوەی خاوەنی سەدان سەرچاوەی دەوڵەمەندی سروشتیە، رێڕەوێکی گەورەی بازرگانی وڵاتانی دراوسێیە، خاوەنی نەوت و غاز و کانزاکانە، دەیان دەشتی بە پیتی کشتوکاڵی هەیە، کەچی گەنجەکانی هەزاران میل دەریا دەبڕن و بە رێگەی مەرگ خۆیان دەگەیننە ئەورووپا.
ساڵی ٢٠٢١ کاتێک بە دەیان هەزار کۆچبەری کورد لە بیلارووس دەرکەوتن، حکوومەتی هەرێمیان تووشی شەرمەزارییەکی گەورە کردەوە چونکە تا ئەو کاتە بەرپرسانی هەرێم هەوڵی شاردنەوەی دیاردەی کۆچیان دەدا بەڵام ئەو شەپۆلە فراوانە وایکرد هەرێم لای بەرپرسانی عێراق و ئەورووپا تووشی ئیحراجی و ئابڕوو چوون بێتەوە.
رێبوار حەمەلاو ئەحمەد